Наргиз Гюлечова
Аьхиримжи йисари табасаран баяри спортдиан аьхю хъуркьувалар улупури а. Гъийин йигъаз жюрбежюр спортдин жюрйириан вари дюн’яйиз машгьур гъахьи табасаран спортсменар ахьуз. Шагьрариъ яшамиш шулайи абйир-бабари чпин веледар бицIи вахтналанмина спортдиин машгъул апIура. Му ляхнин натижйирра ужудар вуйиб рябкъюрахьуз. Спортдиин машгъул вуйи касдин уьмрин рякъра жара, пис терефназди илбицуз читинди ву.
Гъийин макьала Каспийск шагьриъ яшамиш шулайи НичIрас гъулан агьали, бицIи спортсмен Тимур Сефербеговдикан (шиклиъ)вуйиз.
Тимур 2015-пи йисан бабкан гъахьну. Думу гизаф зирек, гьарсаб ляхниз дикъатниинди фикир туври, аьгъювалар гъадагъуз ккуни живан ву. Чав машгъул духьнайи спортдин жюрейианра дугъу ужудар натижйир улупура. Каспийск шагьриъ Мягьямад Гьясановдин хиликкди Тимури 2023-пи йисхъанмина грепплингдиан аьгъювалар гъадагъура. Спортдиин машгъул духьну гизаф вахт даршра, Мягьямад кьюб ражари Дагъустандин чемпион гъахьну.
«Грепплинг спорт узу ктабгъуб вуйиз. Гьяфтайин арайиъ 3 ражари, мектебдиан гъюбан кьяляхъ, узу спортзализ гъягъюри шулза. Тренер Мягьямад Гьясановичди, узухъси, чан хиликк ккайи имбуну спортменарихъра хайлин зегьмет зигура, учкан ужудар спортменар ктауз чалишмиш шула. Дугъу, чан багъри веледарихъанси, бицIину гъардшарихъанси юкIв убгури, учухъ зегьмет зигура», – кIура Тимур Сефербеговди.
Гьарсаб спортдиъ, тренерин кюмекси, хизандианра кюмек ади ккунду. Тренерси, спортсмендин хизанра, дугъахьна лап жавабдарвалиинди, сабурлувалиинди янашмиш духьну ккунду.
«Учу Тимур спортдин секцияйиз гьаайиз цIиб улихьна думу иццру гъахьнийи. Хайлин вахтна больницайиъ имийи. Бай сагъ апIуз спортди кюмек гъапIунчуз. Спортди дугъаз аьзият тувдийкIан кIури, фукьан вушра фикрарик кахъну гъахьунча. Хъа вушра, спортдиин машгъул гъахьи йигъхъанмина, думу, аьлгьямдулиллагь, сарун затра иццру гъахьундар гъапишра, гъалатI даршул. Янаки, пуз ккунди айиб гьадму вуйизки, спортди инсанар якьинди сагъ апIуру. Тренеризра аьхю чухсагъул», – кIура Тимурин абйир-бабар Расим ва Имара Сефербеговари.
Узу сюгьбат гъабхру йигъан, Тимур Гергебил райондиан дуфну хъуркьну имийи. Дина чан хиликк ккайи спортменар тренери хъади гъушдар ву. 10 йигъандин арайиъ дурари марцци гьавайихь тренировкйир гъухну. Гьаму ляхнари бицIи спортменариз ужудар хъуркьувалар гъазанмиш апIуз кюмек тувра.
