Гюльнара Мягьямедова

Хусуси метлеб айи дявдин операция гъябгъюри шубуд йистIан артухъ ву. Гьадму муддатнан арайиъ чпин контрактарин вахт ккудубкIну ясана зийнар духьну гизафдар женгар гъахурайи йишвариан кьяляхъ гъафну.

 

Урусатдиъ хусуси метлеб айи дявдин операцияйин ветеранарикан 48 агъзур касди, ляхнариъ дийигъну, ислягь зегьмет зигуз хъюгъна. Дидин гьякьнаан РФ-дин зегьметнан ва агьалйирин яшайиш уьбхбан министрин сарпи заместитель Ольга Баталинайи мялумат тувра. Дугъу къайд гъапIганси, хусуси метлеб айи дявдин операцияйин иштиракчйириз гизафдариз реабилитацияйиз, сагъламвал мюгькам апIбаз вахт лазим ву. Дявдин гъуллугънаъ гъахьидар ислягь уьмрихъди вердиш хьуз гьюкуматди кюмек тувра.

«Ухьу дурариз цIийи пише гъадабгъуз, жара цирклиъ ляхин апIуз, ясана чпиз айи пишейин дережа за апIуз, урхуз ва аьгъювалар гъадагъуз вари мумкинвалар ачухъ дапIнахьа», – гъапнийи Ольга Баталинайи.

Мидихъди сабси, мобилизацияйиинди хусуси метлеб айи дявдин операцияйиз гъушу касдихьан, хъадакну гъафиган, улихьна учв лихури гъахьи йишв’ина гъюз шулу. Гьаму йисан чвну, СВО-йин иштиракчйириз гъюрайи гъазанждиз дилигди, гьюкуматдин яшайишдин кюмек тувбан гьякьнаан вуйи къанундиъра дигиш’валар тIаъбанди ву. Дигиш’валарин кьяляхъ яшайишдин контракт яркьуди ишлетмиш апIуз хьибди.

Реабилитацияйин ляхнаризра гизаф кьадар пулин дакьатар деетбанди ву, хъа 2025-пи йисан хусуси метлеб айи дявдин операцияйин ветеранари санаторйириъ ва курортариъ сагъламвал за апIбан бадали, Социальный фонднаан 3 миллиард манат жара дапIна. Дупну ккундуки, уьлкейиъ ветеранариз реабилитацияйин 12 центр лихура.
«Гъийин йигъаз хусуси метлеб айи дявдин операцияйин ветеранарихьан 14 агъзур аьрза кьабул дапIна, гьадму кьадарнакан 8600 касди медицинайин реабилитация дубхну, санаторияйинна курортдин рягьятвал гъадабгъну ккудубкIну», – гъапну Баталинайи.
Гьамцдар серенжемари хусуси метлеб айи дявдин операцияйиан дуфнайи ветеранарин сагъламвал къайдайиз хуз кюмек тувра.