Гюльнара Мягьямедова

Июлин 29-пи йигъан Дагъустандин кIулиъ айи Сергей Меликовди Республикайин призывдин комиссияйин ва региондин Оперативный штабдин сатIи вуйи заседание гъубхну.

 

Заседаниейиина гьял апIбан бадали адабгънайи асас месэла хьадукран призывдин кампанияйин натижйир йивуб вуйи.
Региондин военный комиссар Аьбдурягьман Мурадхановди туву мялуматариинди, РФ-дин Яракьлу Кьувватарин ва жара кьушмарин жергйириз гьаму йисан хьадукран призывдин вахтна Дагъустандиан 3730 кас гьаъну.
Призывдин кампанияйин дахилнаъди ужуб ляхин гъубху шагьрарин ва районарин арайиъ Мягьячгъала, Каспийск, Дербент, Дагъустандин Огни шагьрарра, Табасаран районра айи.
Републикайин военный комиссари бязи районариъ призывникарин хусуси дестйир тешкил апIбаъ алахьу читинвалариканра гъапнийи.
Сергей Меликовди призывдин ляхин читинди гъябгъюрайи районарин военкоматарикан жигьиларин арайиъ гъаврикк ккаъбан ляхниина хусуси метлеб айи дявдин операцияйин иштиракчйир, «Дагъларин жюр’этлувал» программайин, «Дагъларин кIваинди ими» тешкилатдин вакилар жалб апIбан теклиф дивну.

Мидланна савайи, республикайин кIулиъ айири чвлин призывдин вахт ккебгъайиз районарин главйирикан ва военкоматарикан ляхнин къайда дигиш апIуб ккун гъапIну.
Сергей Меликовди хьадукран призывдин вахтна улихь дивнайи месэлйир тамам гъапIу муниципалитетариз чухсагъул мялум апIури, гележегдиъра дурариз ляхниъ хъуркьувалар ккун гъапIну.
Муниципалитетарин кIулиъ айидарин улихь жигьилар военный училищйириз ва вузариз гьаъбан гъаврикк ккаъбан ляхин дубхну ккунивалин месэлара дивнийи.
Заседаниейин аьхириъ региондин главайи ярхи йисди призывникар яшамиш шулайи йишв аьгъяди гъибтну ккуниваликан гъапнийи: «Муниципальный образованйирин вари главйир ва военкоматар призыварин арайиъ гъубху ляхникан ктибтуз гьязурди ккунду».