Умгьанат Сулейманова
Мялум вуйиганси, гьар йисан «Табасарандин нурар» газатдик «Яв баяр, Табасаран» рубрикайиккди жюрбежюр пишйириъ, урхбаъ аьхю хъуркъувалар гъазанмиш апIурайи, намуслу зегьмет зигурайи ихь халкьдин вакиларикан макьалйир кми-кмиди чап апIури шулча. Гьамусяаьтна хайлин ихь ватанагьлийир Урусатдин жюрбежюр шагьрариъ яшамиш шула. Гьелебетда, фуну гъуллугънаъра, ляхниъра ихь ватанагьлийири гъазанмиш гъапIу хъуркьувалариин ухьу шад вухьа. Гьаму макьалайиъ узуз гьацдар жигьиларикан сар, ихь ватанагьли Гюлмягьямадов Казбек Сабировичдикан ктибтуз ккундузуз. Ставрополь шагьриъ яшамиш шули, дугъу ляхниъра, жямяаьтлугъ уьмриъра анжах чан инсанвалин ужудар лишнар ачухъ апIура.
Магьа ухьуз аьгъюганси, гъубшу гьяфтайиъ жвуми йигъан Табасаран райондин Туруф гъулаъ мист ачмиш апIбан аьхю сернжем кIули гъубшну. Мист ккебгъур, думу дивуз дакьатариинди кюмек гъахьир Казбек Гюлмягьямадов ву. Мист абццбахъди аьлакьалу серенжемдиз Табасаран райондин главайин мясляаьтчи, Хянягъ гъулан мистан имам Надир гьяжи Зулфикьаров, Дербентдин «Баб ул-Абваб» мистан вакил, Шейх Аьбдулла Эфендийин ччвурнахъ хъайи мусурман диндин университетдин ректор Аьриф гьяжи Сяидов, Кафари Кавказдин мусурмнарин ихтиярар тамам апIурайи Чечен ва Дагъустан республикйирин вакил Шагьабутдин гьяжи Керимов, Дербент шагьрин жумин мистан вакил ва Шейх Аьбдулла Эфендийин ччвурнахъ хъайи исламдин университетдин мялим Расул гьяжи Каибов, ТинитI гъулан мистан имам Рягьим гьяжи Рягьимов ва хъанара хайлин хялар дуфнайи.
Серенжем ачмиш гъапIур Туруф гъулан мистан имам Аьбдулнасир Нурмягьямедов ву. Думу ккебгъну ккудубкIайизкьан Рягьим гьяжи Рягьимовди кIули гъубхну. Сапби гаф Табасаран райондин глава Мягьямед Къурбановдин ччвурнахъан дуфнайи Надир хаджи Зулфикьаровдиз тувну. «Гьюрматлу Туруф гъулан жямяаьт, Казбек, уву аьхю гъапIу, увуз гьамциб тербия туву абйир-бабариз аьхю чухсагъул. Уву увуз ва яв мирас тухумдиз уьмриз мянфяаьт кайи ляхин гъапIунва. Ухьу гъудган, дюаь апIруган, гьаммишан Аллагьдикан ккун апIурхьа ихь веледарин сагъвал, дюн’яйиин ислягьвал, ва ужуб аьхират жвуван абйир-бариз ва жвуван хизандиз. Хъа гъи магьа ухьуз рябкъюрайиганси, Казбекди чан абйирин васият тамам дапIну, жвув гъулан байра вуйиб улупну. Гъийин девриъ, ухьуз гъазанмиш апIуз варидариз мумкинвалар тувна. Хъа думу фициб саягъниинди ва наана харж апIурушра, аьгъяди ккунду. Гъи дугъу дапIнайи ляхни чав Аллагьдин рякъюъ айиб шикиллуди улупна. Чухсагъул увуз Казбек, увусдар баяр хъанара артухъ ишри. Уву гъазамиш апIурайиб хъанара артухъ ибшри».
Шейх Аьбдулла Эфендийин ччвурнахъ хъайи мусурман диндин университетдин ректор Аьриф гьяжи Сяидовди «Баб уль-Абваб» мистан терефнаан цIийи мистаз Кьур’андин 10 китабра тувну. Ва чан терефнаан гьамци гъапну: «Гъулаъ мициб мист хьуб – му аьхю девлет ву. Чухсагъул дупну ккунду Казбекдин дада Раз’яханумдиз ва адаш Сабириз мицисдар баяр аьхю гъапIу. Баяр шубарин хъуркьувалар думу адашди ва дадайи туву тербияйилан асиллу ву. Му мистан гюрчегвал гъябкъю вахтна, узуз йигъан мина гъюзкьан ккун гъабхьунзуз. Му мист диву тикилишчйиризра чухсагъул дупну ккунду.
Аьриф гьяжи Сяидовди чан гафарин кьяляхъ, Казбек Гюлмягьямадовдиз Чухсагъулин кагъаз тувну.
Казбек Гюлмягьямадов Табасаран райондин Туруф гъулаъ 1977-пи йисан бабкан гъахьну. Дурарин хизандиъ Казбек аьхюну бай ву. Дурар юкьур чви ва сар чи ву. Кьялан мектебдин кьяляхъ, Казбекди Дербент шагьриъ ерлемиш дубхьнайи Москвайин гьюкуматдин университетдиъ юридический факультет ккудубкIну. Казбек Ставрополь шагьриъ яшамиш шули хайлин йисар ву. Дугъу чан уьмрин юлдаш Айнайихъди кьюр велед тербияламиш апIура.
Казбек гизаф дугъри кас ву. Дугъкан вуйи макьала бикIуз кIури телефондихъан аьлакьайиз удучIвган, дугъу гьамци гъапну: «Учвкан саб тIалаб вуйиз – узкан гизаф дибрикIуз. Хъа шлубдиз узу кюмек апIуз гьаммишан гьязур вуза».
Мист кьюд йисандин арайиъ Казбекдин адашдин бицIину гъардаш Нюсрет Гюлмягьямадовдин регьбервалиинди дивуб ву. Душваъ 250 касдизкьан гъудган апIуз йишвар а.
Чухсагъул Казбекдиз чан Ватан ва халкь бадали алдагъурайи ликариз.
