Наргиз Гюлечова
Дагъустандин «Динамо» Мягьячгъала футболин команда Урусатдин премер-лигайиъ (РПЛ) ади магьа 2-пи йис ву. 2025-2026-пи йисарин футболин фасил ккебгъну гьелелиг цIиб вахттIан дар, вушра сарун гъийин йигъаз командйирин арайиъ швнуд-садар талитар духьна. Гьаддихъди сабси цIийиваларра шула.
Сабпи нубатнаъди духьнайи цIийивалар командайиз футболистар гъадагъуб ву. Гъийин йигъаз Мягьячгъалайин «Динамойиз» 3 футболист гъадагъна. Дурарикан санур гьамусяаьт ихь командайиъ айи Алжириан вуйи Мугьяммад Аззийин аьхюну чве Имад Аззи, кьюрпир Мороккойиан вуйи полузащитник Мехди Мубарик ва шубурпирра Калининграддиан вуйи вратарь Никита Карабашев ву.
«Динамо» Мягьячгъала футболин командайин пресс-гъуллугънан кIулиъ айи Ислам Абакаровди туву мялуматариинди, 10-пи сентябризкьан футболистар гъадагъуз мумкинвал гъубзра. Гьадмугандиз ихь командайиз хъанара артухъ ужудар футболистар хуз планариъ а.
Мидланра гъайри, зиян дубхьну, гьамусдизкьан талитариъ иштирак хьуз духтрари гъитри адру Сослан Кагермазов ва Александр Сандрачукра, багарихьди сагъ духьну, сарун командайин дахилнаъди талитариъ иштирак хьуз хъюгъди. Амма аьхю зиян дубхьнайи Словенияйиан вуйи футбролист Ян Джапойихьан сарун цци футбол апIуз хьибдар, фицики дугъан ликриз яманди иццру дапIна, ва думу чан гьюкуматдиз лик сагъ апIуз душна», – кIури «Динамо» Мягьячгъалайин пресс- гъуллугънан начальникди мялум гъапIну.
Къайд апIуб лазим вуки, Каспийск шагьрин Анжи-Арена стадиондиин гъабхьи аьхиримжи футболин талит «Динамо» Мягьячгъала ва Тольяттийин «Акрон» командйирин арайиъ вуйи. Дюзди кIуруш, «Акрон» кьувватлу командйирикан саб ву, вушра футболин сабпи пайнаъ думу командайитIан ихьдари ужуди уйнамиш апIуйи ва дурариз сабпи голра ипнийи. Хъа кьюбпи пай ккебгъиган, хиял апIин, майдандиина удучIвдар жарадар ву. Гьаз гъапиш, ихь команда яваш гъабхьнийи. Гьаци вуйиганси, ухьуз голра ипну. Натижайиъ 1:1 дубхьну, талит аьхирихъна гъафну.
Гьамусяаьт РПЛ-ин турнирин таблицайиъ «Динамо» Мягьячгъала 9-пи йишв’ин ал.
***
12-пи августди Урусатдин кубокдиз вуйи футболин талитнаъ Мягьячгъалайин «Динамо» Москвайин «Спартакдиин» гъалиб гъабхьну.
1:1 гьисабниинди ккудубкIу асас вахтнан кьяляхъ гъиву пенальтйириъ ихьдариз илибгъну.
