Мейлан Нежефов

Миллетчйирихъди дявдин цIин майдандиъ женг гъабхурайи ихь кьягьялариз нубатнан ражари Хив райондиан гуманитарный гъагъ хьади гъушну. Му жавабдарвалин ляхин чаина гъадабгъур ва баркаллагьниинди кIулиз адабгъур ВДВ-йин ветеран, ЦIийи Фрюгъярин «Ласточка» кIуру бицIидарин багъдин кIулиъ айи Мурад Керимов ву.

«Ихь баярихьна гуманитарный гъагъ хьади гъягъюри, гьамус юкьуб кIуру раж вуйиз. Му баркаллу ляхник вари райондин агьалйирин пай ка. Хъа аьхиримжи ражну гъубху гуманитарный гъагъназ кюмек туву ЗахитI гъулан бицIидарин багъдин заведующий Набисат Жамаловайиз ва райондин образованиейин отделин методист Наима Аьлимягьямадовайиз, мидланра савайи, гьарганси гьамусра бакар гъахьи райондин глава Ярмет Ярметовдиз ва дугъан сарпи заместитель Агъамирзе Гьямзабеговдиз вари кьягьяларин терефнаан аферин кIураза. Ялгъузди дархьуз, узухъди йиз бай Адамра гъадагънийза. Учухь шубуб генератор, шубуб бензопила, сабпи нубатнаан герек шлу рубар, дармнар, марццишназ вуйи сяйбнар, парашкар, шампнар, силбарин пастйир, щеткйир ва алабхьру, ипIру, убхъру сурсатариканра хьайчухь. Гъит ихь баяриз мидкан дарман ибшри, ва гьаму йигъари гъалибвал гъадабгъну, ихь игитариз багъри юрдариз хъадакну гъюб кьисмат ибшри», – гъапнийи ич сюгьбатнаъ Мурад Керимовди.