Зубайдат Шябанова
Августдин 26-пи йигъан Хючна гъулаъ культурайин Хулаъ Табасаран райондин глава Мягьямед Къурбановдин регьберваликкди мялимарин августдин яркьу совещание кIули гъубшну.
Совещаниейиъ РД-йин Халкьдин Собраниейин депутат Алавудин Мирзабалаев, ДГПУ-йин ректор Нариман Асваров, РД-йин образованиейинна илимдин Министерствойин вакил, Дагъустандин А.А. Тахо-Годийин ччвурнахъ хъайи НИИ-йин методический ляхнарин директорин заместитель Низами Сафарялиев иштирак гъахьну.
Серенжем ачмиш апIури, Мягьямед Къурбановди къайд гъапIганси, гъи ремонтдин ляхнар духну мектебар гьязур ва гьаму деврин авадлугъарихъди тямин дапIнашра, образованиейин процессдиъ варитIан важиблудар мялим ва ученик ву.
«Райондиъ мялимар гьуркIрадар. Гьаддихъди сабси, педагогический образованиейин идарйирин ва райондин мектебарин арайиъ сигъ аьлакьйир адар. Му месэла гьял дапIну ккунду. Райондиъ 70 мялимди чпин дару пишекарвалиан дарсар кивуз мажбур духьна. 20 мектебдиъ 10-11-пи классариъ урхурайидар вари сатIиди гъадагъишра, 100-кьан ученик адар. Му аьгьтвалатнаъ, район образованиейин цирклиан улихь гъябгъбан бадали, мектебар-интернатар арццну ва гьязур мялимар жалб дапIну ккунду. Игь метлеб му месэла гьял апIуб ву», – гъапну Мягьямед Къурбановди.
Совещаниейин иштиракчйир РФ-дин образованимейин министр Сергей Кравцовдин видеообращениейихъ хъпехъбан кьяляхъ, дурарихьна Нариман Асваров, Алавудин Мирзабалаев, Низами Сафарялиев илтIикIну.
Чпин улхбариъ дурари кадровый месэлйир гьял апIбан рякъярикан, федералин образованиейин гъурулушдиъ багарихьди шлу дигиш’валарикан ктибтну.
Табасаран райондин образованиейин Управлениейин вахтназ вуди начальникдин вазифйир кIули гъахурайи Багъиш Аьгьмедовди 2024-2025-пи йисари образованиейин цирклиъ гъубху ляхникан ва улихь дивнайи планарикан доклад гъурхну. Хъа Табасаран райондин Гимназияйин директор Элина Шихмягьямадовайи ва Дарвагъ гъулан 1-пи нумрайин мектебдин директорин заместитель Нурлан Исмяиловди чпин докладариъ образованиейин циркил артмиш апIбаан Табасаран райондин тажруба мисал вуди гъадабгънайи региондин проектарикан, мялимвалин пишекарвалин дережа ва мялимарин престиж за апIру рякъярикан гъулхну.
Совещаниейин аьхириъ республикайин ва федералин дережайиъ хъуркьувалар гъадагъу 16 мялимдиз Гьюрматнан грамотйир ва пешкешар тувну.
