Коронавирус тарабгъбан хатIа айивализ лигну, Дагъустандин Глава Владимир Васильевдин Указдиинди, мартдин 19-пи йигълан мина Дагъустан Республикайин идара апIбан органар, гьюкуматдин саб вуйи гъурулушдин республикайиъ айи кьувватнан ва чарасуз гьялнан ляхнариз лигру гъурулушар заан гьязурлугъ’валин къайдайиз адаъна.
Республикайиъ 19-пи мартдихъан мина махлукьатлу серенжемар, гьадму гьисабнаан дилаварчивалин, спортдин, шадлугънан, культурайин ва жара мажлисар, гъахувал къадагъа дапIна.
ЦIийи уьзрихъди гъагъи аьгьвалат айи уьлкйириан хъадакну Дагъустандиз гъафи агьалйирикан 14 йигъандин арайиъ чпин хулариан удудучIвувал ккун дапIна. Республикайин гьюкмин органариз агьалйирин гьюкуматдин ва муниципалин гъуллугъар электрондин жюрейиинди гьуркIувалин гьякьнаан табшуругъар тувна. Ватандашари ляхин апIурайи йишвариъ гъуллугънан кабинетарин, классарин ва жара ужагъарин, сатIиди ишлетмиш апIру йишварин гьар йигъан дезинфекция апIувал лазим ву.
Указдиз асас вуди, респуб-ликайин медицинайин тешкилатар коронавирусдин уьзур сагъ апIру дармнарихъди, дезинфекция апIру ва инсандин беден вирусдихьан уьбхру алатарихъди тямин дапIнади ккунду.
Гизаф инсанар уч шлу йишвариъ ляхин апIурайи хусуси компанйири ва дилаварчйири инсанар гизаф уч шлу йишварихь, раккнарихъ гьава марцц апIру авадлугъар дивну ккунду.
Республикайин антимонопольный гъуллугъариз аптек-йириъ дармнарин ва хусуси беден вирусдихьан уьбхру алатарин кьиматар за апIуз гъидритувалин зиин гюзчивал гъабхувал табшурмиш дапIна.
Эпидемияйиз аьксиди удучIвбан бадали, агьалйирин яшайишдин игьтияжар гьуркIбан идарйир ва йитим бицIидарин хулар мюгькам къайдайиинди ляхин апIуз хъюгъну ккунду.
60 йистIан артухъ вуйидариз
Коронавирусдин инфекция аьзарлу инсандикан сагъу инсандик багахь аьлакьйирилан, аьзарлуйи инчйир ясана уьгьйир апIбалан кубчIвру. Уьгьйир апIруган аьзарлуйин ушвниан утIурччву ширшнан литIнар багахь хьайи жара инсанаринра хилар кучру алатарик куркIру. 60 йистIан артухъ яшар духьнайидариз цIийи уьзрихьан артухъси хатIа а.
Яшлу инсанарин бедендин иммунный гъурулушдиз гъагъ алабхъурайивалиан вирусдин пневмония (гъурдлар аьргъювал) хьуз мумкинвал а. Думу уьзри бегьем сагъ’вал адру инсан ккагъру.
Жямяаьтлугъ йишвари-хьна дурушди гъузуз, гизаф халкь айи вахтна жямяаьтлугъ транспортдиъди дяргъюз мумкинвал абгай, туканариз гъягъювал яваш апIинай.
Машар-хилар кми-кмиди жикIай, марццишин чарасуз лазим ву. Кючейиан, жямяаьтлугъ йишв’ан, тукандиан гъафиган, хилар сябнихьди жикIай. Марцци дару хиларихьди машнак, хъюхъник, уларик мукучанай – хиларик кубкIнайи вирус бедендиъ абхъуз мумкин ву.
Кагъзикан дапIнайи хилин ягълухъар ишлетмиш апIинай, уьгьйир апIруган ушв, хъюхъ элебкай, хъюхъ марцц гъапIу кагъзин ягълухъ дишлади гатIабхьай. Жямяаьтлугъ йи-швариан гъафибси ичв тавра, телефон, китабар, жара алатар ламун салфеткйирихьди марцц апIинай.
Эгер учву фунуб уьзриан вушра аьзарлу гъахьнуш, поликлиникайиз гъягъювал лазим дар, духтрикан учвухьна хулаз гъювал ккун апIинай.
Эгер учвуз, аьхъю дубхьну, аьзарлу гъахьнуш, хъа аьхиримжи гьяфтайиъ ичв багахьлуйирикан фужкIа харижи уьлкйириан гъафнуш, гьаддикан духтриз чарасуз вуди йипай. Дугъу учвук коронавирусдин инфекция каш ахтармиш апIувал тяйин апIиди.
Ичв ва багахьлуйирин сагъ’вал уьбхяй!
