Зубайдат Шябанова
Августдин 30-пи йигъан Табасаран райондиъ Кьалухъ Мирзайин ччвурнахъ хъайи спортдин дараматдиъ райондин глава Мягьямед Къурбановдин табшуругъниинди бицIидарин ва живанарин арайиъ Кьур’ан урхбаан конкурс кIули гъябгъиди.

Конкурс яшнан кьюб категорияйиан гъабхуру: яшар 13 йис хьайиз вуйидарин ва 13 йислан 17 йис дубхьнайидарин арайиъ.
Мажлис сабпи нубатнаъди аргъаж шулайи наслин диндинна эдебнан тербия мюгькам апIуз, бицIидар ислам диндин культурайихьна ва аьгъюваларихьна жанлу апIуз гъабхурайиб ву. Мидланра гъайри, конкурс гъабхбаъ жигьиларин Кьур’андинна гьядисарин аьгъюваларин багьалувалар кьувватлу апIбан ва экстремизмин идеологияйиз къаршувал улупбан мянара а.

Тешкилатчйири гьарсаб яшнан категорияйин гъалибчйириз ва призерариз ужудар пешкешар гьязур дапIна. Сабпи йишв гъадабгъуриз тувру асас пешкеш Умрайиз путевка ва 50 агъзур манат ву. Кьюбпи йишв гъадабгъуриз – 30 агъзур ва шубубпи йишв гъадабгъуриз 20 агъзур манат тувди.
Серенжем августдин 30-пи йигъан гачIвнинган сяаьт 9:00 ккебгъру. Иштирак хьуз ккунидари 8 (988) 202-53-65, 8 (963) 402-57-98 телефонариз зенг дапIну, заявка тувну ккунду.
Гъийин йигъаз заявка 30-тIан артухъ жигьилари ва живанари тувна.