Гюльнара Мягьямедова
Дагъустан Республикайиъ 2025-пи йисан 14-пи сентябрин варидари сабишв’инди сесер тувру йигъаз муниципальный сечкийин 610 кампания тяйин дапIна. Асас къарар мялуматарин дакьатариъ чап дапIна. Сечкйирикан асас мялуматар туврача.
Сечкйир 6 шагьрарин округдиъ – Мягьячгъалайиъ, Буйнакскдиъ, Дагъустандин Огнийиъ, Каспийскдиъ, Кизляриъ, Кьибла Сухокумскдиъ ва гьацира муниципальный 38 райондиъ гъягъиди.
14-пи сентябри гъахру муниципальный сечкйирин кьяляхъ депутатарин вакилвалин органарин 5986 мандат пай апIиди: шагьрарин округарин арайиъ – 149 мандат ва шагьраринна гъуларин поселенйирин арайиъ – 5837 мандат.
Республикайин шагьрарин округариъ вакилвалин 6 орган ва шагьрарин ва гъуларин поселенйирин 581 орган арайиз хиди.
14-пи сентябри республикайиъ кIули гъягъру сечкйирин сиягьариз 1 миллионна 300 агъзуриинакьан сечкичйир гъадагъна.
Сесер тувру 12-14-пи сентябри Дагъустандин Огни шагьриъ ерли самоуправлениейин вакилвалин органдиз вакилар ктагъбан сечкйир гъягъиди.
Дагъустандин Огни шагьрин жилариин сечкийин комиссияйи «Дагъустандин Огни шагьур» шагьрин округдин депутатарин Собраниейиз депутатарди ктагъуз улупнайи кандидатарин сиягь гьязур дапIна. Кандидатар «ЦIийи инсанар» политикайин партияйин РД-йиъ айи региондин отделениейин, «Саб вуйи Урусат» Вариурусатдин политикайин партияйин Дагъустандин региондин отделениейин Дагъогнийин ерли отделениейин, Урусатдин либераларинна демократарин – ЛДПР политикайин партияйин Дагъустандин региондин отделениейин, «Урусатдин Федерацияйин Коммунист партия» политикайин партияйин Дагъустан республикайин Дагъогнийин шагьрин ерли отделениейин, «Гьякьлу Урусат – Ватанперверар – Гьякь бадали» политикайин Социалист партияйин Дагъустандин Огни шагьриъ айи ерли отделениейин сечкичйирин тешкилатари улупнайидар ву.
РД-йин Избиркомдин улупбариинди, Дагъустандин Огни шагьриъ 23 330 кас сечкичйир а. Сесер тувру йигъан шагьрин ругариин сечкйирин 12 участокди ляхин апIиди. Сесер тувбан натижйириинди шагьрин собраниейиз 5 йисазди 22 депутат ктагъиди.
Гьюрматлу ватанагьлийир, сесер тувбаъ иштирак хьуз дих апIурача. Сечкйириъ иштирак хьуб гьарсар касдин ватандаш’валин буржи ву.
