Гюльнара Мягьямедова

Дагъустандин Глава Сергей Меликовди республикайин агьалйир аьгъюваларин йигъахъди ва урхбан цIийи йис ккебгъбахъди тебрик гъапIну. Чан илтIикIбаъ дугъу 1-пи сентябрь шаду ва гьаддихъди сабси кIвак гьяракат кипру машквар вуйиваликан гъапнийи. Гьаму йисан Дагъустандин 48 агъзур бицIир сабпи ражари мектебдиз гъушну. Хъа 9-пи, 11-пи классариъ урхурайидариз мектебдин партайихъ адапIру аьхиримжи урхбан йис улубкьну.
Сергей Меликовди къайд гъапIганси, заан ери айи образование ва аьгъювалар тувбан ужудар шартIар региондин артмиш’валинси, вари уьлкейин артмиш’валин кьувватлу дакьат ву. «Жигьилар ва бицIидар», «Хизан» милли проектар уьмриз кечирмиш апIури, республикайиъ 5140 бицIириз йишв айи цIийи 14 мектеб ва 450 бицIириз йишв айи бицIидарин кьюб багъ ачмиш гъапIну. Гьаму йис ктабхъайиз 600 бицIириз йишв айи кьюбсан мектеб ва 250 бицIириз йишв айи бицIидарин сабсан багъ ачмиш апIуб планламиш дапIна.
Дагъустандин Главайи вари урхурайидариз хъуркьувалар, дурари чпин улихь дивнайи месэлйир кIулиз адагъуб ккун гъапIну. Дугъу мялимариз ва абйир-бабариз гьюрматнан гафар гъапну.

Республикайин образованиейин ва илимдин министерствойин мялуматарин гъуллугъну журналистариз туву хабрариинди, уьлкейин жара регионарихь тевиган, ихь республикайиъ варитIан гизаф цIийи мектебар ачмиш дапIна.
«Дагъустандин вари мектебариъ урхбан цIийи йисан сабпи зенг гъивну. ЦIийи 14 мектеб ачмиш апIуб – му хъана аьхю дамагъ ву. Думу кьадар мектебар ачмиш апIуб аргъаж шулайи насларин гележегдиз гьюкуматди аьхю фикир туврайивалин лишан ву», – дупна мялуматнаъ.
ЦIийи метебар Мягьячгъала, Каспийск, Къизлар шагьрариъ, Къизлар, Нугъай, Къарабудагъкент, Хасавюрт ва Гъяякент районариъ ачмиш гъапIну.