Гюльнара Мягьямедова
12-14-пи сентябри Дагъустан Республикайиъ гьюкмин ва агьалйирин аьлакьа улупру важиблу гьядиса гъябгъиди. Сесер тувбан сатIи вуйи йигъан дахилнаъди шагьрин 6 округдиъ ва муниципальный 38 райондиъ сечкйирин 609 кампанияйи ляхин апIиди. Сечкйириз гьязур шули, сечкйирин участокариъ аьхиримжи гьязурлугвалар гъягъюра: агьалйирин хатIасузвал уьбхбан, думу йигъари электроэнергия гьубкIну тямин апIбан, сакьат инсанарихьан сесер тувуз шлу шартIар тямин апIбан месэлйир гьял дапIну ккудукIура. Асас фикир хусуси метлеб айи дявдин операция гъябгъюрайи йишвариан дуфнайи дявдин гъуллугъчйир сечкйириъ иштирак хьувализ тувди.
Муниципальный сечкйириз Табасаран районра гьязурди а. 9-пи сентябри Табасаран райондин администрацияйиъ участокарин сечкйирин комиссйирин председателарихъди совещание гъабхьну. Совещаниейиъ Табасаран райондин глава Мягьямед Къурбанов, дугъан сарпи заместитель Рамис Уьсманов ва гъуларин поселенйирин главйир иштирак гъахьну.
Совещаниейин иштиракчйири 12-14-пи сентябри кIули гъягъру шубуд йигъан сесер тувбан муниципальный сечкйир тешкиллувалиинди гъахбан месэлйир гьял гъапIну.
Серенжем ачмиш апIури, Мягьямед Къурбановди къайд гъапIганси, сечкйир йисандин жямяаьтлугъдинна политикайин важиблу гьядиса ву. «Гьамина уч духьнайидарикан сечкйир гъахру йигъари йишвариин ачмиш дапIнайи участокариз шлубкьан гизаф сечкичйир иштирак хьувал тямин апIуб, сесер тувруган, къанундин вари тIалабар тамам апIури, заан жавабдарвал улупуб ккун апIураза», – гъапну муниципалитетдин главайи.
Дугъу гьацира сечкйир ачухъди, къайдасузвалар адарди, заан дережа-йиъди, сечкйирин участокариъ ватандашарин хатIасузвал уьбхюри духну ккуниваликан гъапнийи.
Муниципальный сечкйир гъахру шубуд йигъандин арайиъ фициб къайдайиинди ляхин дапIну ккундуш, сечкйирихьна район Табасаран райондин ТИК-дин председатель Исамутдин Исаевди газатдин журналистдихъди сюгьбат гъубхну.
«2025-пи йисан 14-пи сентябри Табасаран райондин ругариин райондин гъуларин поселенйирин вакилвалин органариз депутатар ктагъру сечкйирин 21 кампанияйи ляхин апIиди.
Сечкйир гизаф мандатар айи сечкийин саб вуйи округдиъ гъахура, сесер тувбан натижйириинди 231 мандат пай апIиди.
Муниципальный сечкйирин гьязурлугвалариъ, сечкйир гъахбаъ участокарин 64 комиссия иштирак шула. Сечкичйирин сиягьназ 33068 ватандашар гъадагъна. Сечкйириз шлубкьан гизаф ватандашар жалб апIбан бадали, сечкйир шубуд йигъан – 12-пи, 13-пи, 14-пи сентябри – гвачIнин сяаьт миржибдиан хябяхъдин сяаьт миржибдизкьан гъахиди. Сесер тувбахъан Жямяаьтлугъ палатайин, политикайин партйирин вакилари гюзчивал гъабхиди.
Кандидатар улупру вахтна регистрация апIбан бадали 359 касди документар тувнийи. Сечкйириъ политикайин 7 партияйин региондин отделенйирин ва кIул’инди кандидатура улупдари иштираквал апIура.
Ватандашарин сесер тувбан ихтиярар уьрхбан бадали, йишван сечкйирин комиссияйиъ «горячий линияйи» ляхин апIиди.
Сечкйирин вари 64 комиссия жиниди сес тувру кабинйирихъди, стационарный ва саб йишвлан тмуну йишв’ина гъахру ишкIарихъди, компьютерарихъди, видеорегистрация апIру гъурулушдихъди, документар уьрхру сейфарихъди тямин дапIна.
Сесер тувру йигъари сечкйирин кампанияйи жямяаьтлугъдин хатIасузвал тямин апIбан, сечкйирин документар уьрхбан, участокдин комиссияйин членари документар йишван сечкйирин комиссияйиз хруган, дурариз кюмек тувбан бадали, къанун уьбхру органарихъди аьлакьа уьбхиди. Сечкйирин документар гъахи вахтнахъанмина сечкйир ккудукIайизкьан, гьарсаб участокдиъ хатIасузвал уьбхбан ва ватандашарин сесер тувбан ихтиярар тямин апIбан бадали, полицияйин нарядди дежурство гъабхиди», – гъапнийи Исамутдин Исаевди.
Исамудин Исаевди комиссйирин вари членарикан сечкйир гъахбан къайдйир тамам апIуб, къайдасузвалариз рякъ хъябкьюб, сечкйир заан дережайиъди гъахувал тямин апIуб ккун гъапIнийи.
Гьюрматлу ватангьлийир! Сеч-кйириъ иштирак хьуб ихь ватандаш буржи ву. Гъачай, ихь буржи намуслувалиинди тамам апIурхьа. Ичв сес жарадари ишлетмиш апIуз мигъитанай, вари сечкйириъ иштирак йихьай!
