Гюльнара Мягьямедова

16-пи сентябри Дагъустан Республикайин образованиейин ва илимдин министерствойиъ 2025-пи йисан ужударсдар мялимариз премйир тувбан конкурсдин комиссияйи чан ляхин ккебгъну.

 

РД-йин Халкьдин Собра-ниейин образованиейин ва илимдин комитетдин председатель Елена Павлюченкойин жягьтлуваликкди республикайин ужударсдар мялимариз премйир тувбан гьякьнаан дуфнайи аьрзйир гьял апIуз хъюгъну. Думу ляхниъ РД-йин образованиейин ва илимдин министерствойин, региондин образованиейин идарйирин вакилар иштирак гъахьну.

РД-йин образованиейин ва илимдин министрин приказдиз асас вуди, сабпи августдилан 10-пи сентябризкьан конкурсдин комиссияйи аьрзйир кьабул апIури гъахьну. Вари 359 аьрза гъафнийи, дурарикан комиссияйи гьял апIбан бадали 180 аьрза кьабул гъапIнийи.
Конкурсдин комиссияйи 16-пи сентябрилан 25-пи сентябризкьан гъубху ляхнин натижайиъ 100 гъалибчи гъядягъиди. Дурарикан гьарсариз мялимвалин ляхниъ заан хъуркьувалар гъадагъбаз дилигну, 100 агъзур манат премия тувди.