Гюльнара Мягьямедова
23-пи сентябри Избербаш шагьриъ жигьиларин «Каспий» форум ачмиш гъабхьну. Гьаму йисан форумди Урусатдин 60 региондиан ва Абхазияйиан, Черногорияйиан, Йемен Республикайиан, Молдовайиан, Грузияйиан, Казахстандиан, Таджикистандиан ва Белорусь Республикайиан 500-дилан зиина жигьилар, гьадму гьисабнаъди Сарпидарин гьяракатнан 200 иштиракчи уч гъапIну. Серенжем «Жигьилар ва бицIидар» милли проектдин дахилнаъди гъабхурайиб ву.
Ватан уьбхрударин ва Гъалибвалин 80 йис тамам хьпаз бахш дапIнайи гьаму йисан форумдин иштиракчйир ватанпервервалин месэлйириз лигру «Гъалибвалин волонтерар», «Урусатдин аьжалсуз полк», «Культурайин волонтерар», «Медикар-волонтерар» федеральный тешкилатарин вакиларихъди сатIиди натижалу проектариин лихура.
Форумдин асас натижа уьмриз кечирмиш апIуз гьязурди айи яшайишдин теклифар кьабул апIуб ву. Думу жюре теклифариз Урусатдин жигьиларин ляхнариз лигру федеральный агентствойин, РД-йин главайин грантарин ва Президентдин грантарин конкурсариъ кюмек тувди. Гъалибчйириз сертификатар тувбан серенжем Дагъустандин глава Сергей Меликовди гъабхиди.
«Каспий» форум сюгьбатар гъахбан майданси, уьлкейин кадрйир гъядягъбан ва дурариз кюмек тувбан дакьатра ву. Гьарсар иштиракчийикан ухьу жавабдарвализ ва чахьан удукьру кюмекназ ккилигурахьа. Гъадагъу грантар жвуван регионариъ яшайишдин мянфяаьтлу проектар уьмриз кечирмиш апIуз туврайи мумкинвал ву. Форумди вари иштиракчйир ихь гьюкуматдин асиллу дарувал ва хатIасузвал мюгькам апIбак чпи киврайи пайнан гъаврикк ккаур кIури, умуд кивраза», – гъапну РД-йин Правительствойин председатель Аьбдулмуслим Аьбдулмуслимовди.
Хьуд йигъандин арайиъ форумдин иштиракчйир образовательный программйириъ иштирак хьиди: уьлкейин машгьур экспертарин лекцйирихъ, сюгьбатарихъ, уьмрин тажрубайин дарсарихъ хъпехъиди. Урусатдин Игитарин, ветеранарин, абйир-бабарин тешкилатарин ва жигьиларин политикайин цирклиан вуйи экспертарин иштираквалиинди «Ватан уьбхрудар: тарихдин цIийи кIул. Ухьу думу фици сатIиди бикIура» ва «Насигьятчивалин асас бина: хизандиъ ва мектебдиъ айи ужудар аьдатарихьан гьюкуматдин хатIасузвалихьна» кIул тувнайи сюгьбатариинди форумдин программайин асас пай гъябгъиди.
Форум Урусатдин жигьиларин ляхнариз лигру агентствойин, РД-йин Правительствойин, гьацира Урусатдин «Знание» жямяаьтлугъдин, «Ватандаш теклифарин тереф уьбхру центр» АНО-йин, «Урусатдин ватанперверарин центрин», «Гъалибвалин волонтерарин» ва гьацдар жарадарин кюмекниинди гъабхурайиб ву.
