Гьюрматлу ватанагьлийир! Газатдин гьаму нумра ихь гирами, чпин уьмур бицIидариз аьгъювалар, тербия туври адапIу мялимариз бахш дапIнача.
Мялимарин пишекарвалин йигъ… Думу машквар асасуб ву, фицики ихь гьарсарин кIулиъ мялимдикан вуйи фикрар гьаргандиз гъузру. Мялимар варитIан лайикьлу инсанар ву. Дурари ужуб насигьятра тувди, кюмекра апIиди, лазим вуйиб улупидира ву.

Гъи уьлкера, девирра гьяракатниинди дигиш шула. Жямяаьтлугъдин уьмурси гьамусдин деврин мялимдин уьмурра сикинуб дар. Мялимвалин пишейи мялимдикан дерин аьгъюваларси рюгьнан кьувват, сабур, бязиган кьягьялвалра кмиди ккун апIуру. Хъа алахьурайи вари читинвалариз дилигди, чпин уьмур мектебддиз ва бицIидариз бахш апIурайи касар имбували ухьу шад апIура.

Мялимар кьаби гъахьишра, гьаргандиз ужудар, гъавриъ шлу, зигьимлу инсанарди гъузру. Учву гизаф насларин артмиш’валик, тербия тувбак лап аьхю пай кивунчва. Мялим машгьур ччвур ву. Гъи учву дарсназ гъягъюри адаршра, мялимдин машквар гьаргандиз ичвуб вуди, ичв зегьметназ, ичв чалашмиш’валариз гьюрматси гъубзди.

Машквран йигъан мялимариз мюгькам сагъвал ккун апIурача. Гъит, ичв алдабгъу гьарсаб гам шадвали ва хъуркьувалари абцIнайиб ибшри. Учву дарс киву баяр-шубариин дамагъ апIрубси, дурар ичв бажаранвалин лишанси гъузри. Учву дюн’яйиъ айи вари ужувлариз лайикь вучва, гележегдик аьхю пай кивбаз учвуз чухсагъул мялум апIурача.