Наргиз Гюлечова
Гьаму йигъари Дагъустандиъ вари халкьарин арайиъ вуйи, гъагъиди ебхьру жигьилариз ва живанариз тешкил дапIнайи форум гъабхьну. Думу «Ужувлан хядарин гъварч» ччвур тувнайи Вариурусатдин фестивалин дахилнаъди кIули гъубшуб ву.
Серенжем «Умуднан малайик» фондну, Вариурусатдин гъагъиди ебхьрударин жямяаьтлугъдин Москва шагьрин тешкилатдин (МГО ВОГ) Жигьиларин инновацйирин центри ва РД-йин жигьиларин ляхнариз лигру министераствойи тешкил гъапIуб ву.
Форумдиз Москва, Санкт-Петерберг, Пермь шагьрариан ва Узбекистандиан 80-тIан артухъ гъагъиди ебхьру живанар ва жигьилар гъафнийи. Дурарин аьгъюваларин дережа за апIбан бадали, швнуб-сад йигъандин арайиъ Дагъустандин гъагъиди ебхьру живанарихъди сабси тренингар, мастер-классар кIули гъухну.
Форумдин тешкилатчи ва иштиракчи, «Умуднан малайик» фонднан кIулиъ айи Светлана Романовайи туву мялуматариинди, дурари бицIидариз яратмишарин терефси, агъювалар гъадагъбан терефра артмиш апIбаъ кюмек тувра.
«2022-пи йисан фонд ачмиш гъапIунча. Фонд тешкил апIбан асас себеб гьадму вуйизки, гъи гъагъиди ебхьру баяр-шубар яратмишарин ва агъюваларин терефнаан чпиз тувру кюмекназ ккилигура.
Му жюрейин аьзарлу бицIидариз совет вахтари туврайи агъювалар цIиб жара жюрейиинди албагнайи. Гьамус, коррекционный мектебар ва гьаму жюрейин иццрушин кайи бицIидар айи мектебарра сатIи дапIнайивализ лигну, читин жюрейин дигиш’валар гизаф гъахьну. Гьаддиз дурариз кюмек апIувал чарасуз вуди дябкъну, фонд ачмиш апIуз мажбур гъахьир вуза», — гъапну фонднан кIулиъ айири.
Серенжемдиъ иштирак шулайи республикайин жигьилариз ляхнариз лигру министрин заместитель Фарман Меликовди гъапиганси, му серенжемар гъагъиди ебхьру жигьилариз ва живанариз, дурар сар-сарин гъавриъ хьуз гъитри, арайиъ дуствал уьбхюри яратмиш апIурайи гъяд ву.
Къайд апIуб лазим ву, форум Урусатдин Госдумайин депутатарин ва Дагъустан Республикайин главайинна правительствойин кюмекниинди ухьухь гъябгъюри, цци кьюдпи йис ву, ва дидин иштиракчйирин кьадарра сачтIан цци артухъ дубхьна.
Форумдин дахилнаъди Дагъустандиз дуфнайи хялар Каспийск шагьрин администрацияйиъ хусуси метлеб айи дявдин операцияйин ветеранарихъди гюрюшмиш гъахьну. Дидин кьяляхъ шагьрин кьялан майдандиин яркьу вуйи концертдин программара кIули гъубшну. Дина республикайин жигьиларин ляхнариз лигру министр Камил Сяидов, агьалйирин ихтиярар уьрхру Запир Алхасов, РД-йин Халкьдин Собраниейин депутат Гьясан Уьсманов ва «Сарпидар» гьяракатнан Республикайин отделениейин кIулиъ айи Людмила Сяидовара дуфнайи.
Серенжем Светлана Романовайи ачмиш гъапIну. Дуфнайидари республикайин жигьил хялариз хайлин мани гафар гъапнийи. Хъасин Урусатдин ва Дагъустандин гимнарилан концерт ккебгънийи. Дупну ккундуки, Дагъустандин гимн аьдати жюрейиинди — дихнииндиси, тарихдиъ сабпи ражари вуди тIубарин ишарйириинди гъурхнийи. Гимн урхбаъра гъагъиди ебхьру бицIидарси ва живанарси, РД-йин гьюкуматдин хорин, операйинна балетдин театрин артистар ва 11 жюрейин коррекционный мектеб-интернатдиъ урхурайидар иштирак гъахьнийи. Дуфнайи хялари шагьрин агьалйириз аьдатнан дару жюрейиинди, машгьур мяълийир тIубариин ишарйириинди тамам апIури, концерт улупну.
Гьамусдихъантинара му форум гьар йисан Дагъустандиъ кIулиъ гъабхуз планламиш апIура. Иштиракчйиринси, дина теклиф апIру гьюкуматарин кьадарра яркьу апIуз кка. Форумдин тешкилатчйирин гафариинди, гележегдиъ мина Китай, Корея, Вьетнам, Казахстан ва СатIи вуйи Аьрабарин Эмиратариан вуйи бицIидаризра дих апIуз кка.
