Зубайдат Шябанова
Чвлин призывдин кампанияйин вахтна Табасаран райондиан 80 жигьил армияйиз гъахуз планламиш дапIна. Мидкан гьаму йигъари Табасаран райондин глава Мягьямед Къурбановдин регьберваликкди гъабхьи чвлин призывдин комиссияйин заседаниейиъ мялумат тувнийи.Заседаниейиъ райондин главайин жямяаьтлугъдин хатIасузвал уьбхбан цирклиан заместитель Ринат Мирзабалаев, райондин ихтиярар уьрхру органарин вакилар, гъуларин поселенйирин главйир ва военный учетдиз гъадагъру идарйирин (ВУС) гъуллугъчйир иштирак гъахьну.
Табасаран райондин военный комиссариатдин военный гъуллугъназ ватандашариз дих ва армияйиъ гъуллугъ гъабхбахьна гьязур апIру отделин начальник Рафик Кьасумовди серенжемдин иштиракчйириз 2025-пи йисан 1-пи октябри гьяракатнаъ убчIву чвлин призывдин планарикан ктибтну. Дугъу къайд гъапIганси, чвлин призывдин кампанияйин вахтна райондиъ 1285 касдиз армияйиз гъягъбакан хабар туврайи кагъзар хътауз планламиш дапIна. Дурарикан 18 йислан 30 йис’ина вуйи 80 жигьил багарихьди армияйиз гъахиди.
Чвлин призыв 31-пи декабриз давам хьибди. Призывникарин сабпи пай армияйиз 15-пи октябри гъягъюру. Улихьна йисариси, ццира армияйиъ гъуллугъ сад йисан гъабхуру, ва му вахтна ватандин улихь чпин буржи тамам апIурайи жигьилар хусуси метлеб айи дявдин операцйир гъахурайи йишвариз гьаудар.
Рафик Кьасумовди призывдин кампанияйиъ тIаънайи цIийивалариканра мялумат тувну. Гьамус призывдихъди аьлакьалу вуди адабгънайи къарар сад йисан кьувватнаъ гъубзру. Яни, военный гъуллугъ гъабхуз шлувал тасдикь дапIнайи ватандаш гъябгъюрайи призывдин кампанияйиъ армияйиз дурухиш, думу гъюру ражарин призывдин кампанияйин серенжемарин дахилнаъди гъахуру.
Сабсана цIийивал гьаддиъ аки, призывникариз армияйиз дих апIувалин кагъзар гьамус электронный повесткйириинди гъиди. Дидкан мялумат «Госуслуги» порталиъ хусуси кабинетдиз хътауру. Гьаддихъди сабси, кагъаз гъадабгъну 20 йигъандин арайиъ призывник военкоматдиз дарфиш, думу саб жерге ихтиярарихъ мягьрум апIуру.
Гьаддихъди аьлакьалу вуди, Мягьямед Къурбановди гъулан поселенйирин главйириз ва администрацияйинна военкоматдин гъуллугъчйириз агьалйирин арайиъ призывдин кампанияйин цIийиваларикан гъавриъ ккаъбан ляхин гужал апIуб, ихтиярарин ва жавабдарвалин гьякьнаан гъаврик ккауб ва гьацира повестка гъюбан кьяляхъ призывдин комиссияйиккан кIул ккадабгъували РФ-дин къанундин ихтиярар чIур апIурайиваликан хабар дебккуб табшурмиш гъапIну.
