Гюльнара Мягьямедова

10-пи октябри Дагъустандиъ Вариурусатдин «Миллетдин дамагъ –2025» жямяаьтлугъ премияйин СКФО-йин округдин гъалибчйириз премия тувбан серенжем кIули гъябгъиди.

 

Дидин гьякьнаан пресс-конференцияйиъ «Урусатдин халкьарин Ассамблея» тешкилатдин региондин отделениейин председатель Зикрулла Ильясовди мялумат тувну. Дугъу журналистариз «Урусат-йиз тарих» Тарихи паркдиъ натижйир йивру конкурсдикан ктибтнийи.
Зикрулла Ильясовди къайд гъапIганси, «Миллетдин дамагъ – 2025» премияйин метлеб геополитикайин читин шартIариъ, уьлкейиз саки вари Европайи аьксивал улупурайи вахтна, Урусатдин миллетарин сабвал мюгькам апIуб ва миллетарин культура артмиш апIуб ву. Думу ляхин жанлуди гъабхбу ухьу гъалибвалихъна хиди.

Гьаму йисан Вариурусатдин жямяаьтлугъ премия туври йирхьубпи раж ву. Урусатдин халкьарин Ассамблеяйин му проект уьлкейин миржиб федеральный округариъ гъабхура. Ихь республикайиъра гьаму яркьу серенжемдихьна гьязурлугвал «Урусатдин халкьарин Ассамблея» ОГО-йин дестейи гъубхну.
Пресс-конференцияйиъ къайд гъапIганси, округдин комиссияйиз иштиракчйирихьан 41 аьрза (25 аьрза дагъустанлуйирихьан) гъафнийи.
Дупну ккундуки, Дагъустандин меркездиъ сабвалин, гизаф жюре культурйирин аьхю машквар кIули гъябгъиди. Думу сененжемдиъ Кафари Кавказдин сабвалин ва гьацира хусуси метлеб айи дявдин операцияйиъ гъалибвал гъадабгъуз гьязур вуйивалин кьувват улупиди.