Аьхиримжи йисан ветеранариз кюмек апIувал ужуб терефнахъинди илтIибкIну. 9-пи майдин машквриз РФ-дин Президентдин терефнаан тувру пулин пешкеш 75 агъзур манатдиина удубчIвна. Мидланра савайи, РД-йин Главайира чан терефнаан кюмек тувра; му метлеблу ляхниъ районарин главйирра, хайлин спонсорарра иштирак хьуз кка.
Дербент шагьрин ветеранарин Советди, хайлин йисари вари Урусатдин ветеранарин жямяаьтлугъ тешкилатарин устав тамам апIури, Ватандин Аьхю дявдин ветеранарин яшайишдин тереф уьбхбан, аргъаж шулайи наслиз ватанпервервалин тербия тувбан гьякьнаан хайлин мянфяаьтлу ляхин кIули дубхна. Му мялуматар узуз Дербент шагьрин УСЗН-дин идарайин директор Екатерина Колесниковайи тувнийи.
Дугъан гафариинди, Дербент шагьриъ дявдин иштиракчйир лап цIибтIан имдар, зегьметнан фронтдиъ гъилихдарикан чIивиди имбударин кьадарра думукьан аьхюб дар. Магьа дурарин сиягь: Присяжненко Мария Алексеевна, Исакьова Антонина Александровна, Аьзизова Анна Николаевна, Темирова Александра Артемовна (йисирвалиъ гъахьи дишагьли), Мезенцева Евгения Георгиевна.
Ватандин Аьхю дяви ккудубкIну 75 йис тамам шулайивалихъди аьлакьалу вуди Дербент шагьрин администрацияйи иштиракчйириз ва дявдин ветеранариз аьхю фикир тувра.
«Ич идарайиъ ляхин апIурайи гъуллугъчйир 57 кас ву. Учу Ватандин Аьхю дявдин, зегьметнан ветеранарин хулариз гъягъюри, ич терефнаан учхьан шлу кюмек туврача. Хайлин ветеранариз жаради кIул’инди вуйи хулар а. Дурарихьан даршлу вахтна, ветеранар ич идарайиз хурача, мушваъ духтир ва ветеранариз лигру гъуллугъчйирин жаради вуйи десте айич. Гьацира мина Афгъанистандин дявдиъ иштирак гъахьи ветеранарра, инвалидарра ва аьхю хизанариан вуйи, алабхьрубдин, ипIрубдин кьитвал гьисс апIурайи инсанарра гъюру. Гьар йисан, вари машкврар, гьадму гьисабнаан хизандин Йигъра, къайд апIурача.
Читинвал кайи касариз Дербент шагьрин бязи агьалйирира кюмекнан хил гьачIабккуру. Гьарган учуз кюмек апIурайи кас Дербент шагьрин чяхрар гьясил апIру заводдин директор Сядуллаев Мягьямед Мухтарович ву. Дугъаз ич терефнаанра ва гьамина гъюрайи касарин терефнаанра аьхю чухсагъул мялум апIураза.
Гъубшу 2019-пи йисан 730 кас гьарсаб лазим вуйи шейънахъди, ипIрубдихъди тямин гъапIунча. Йигъандин стационар айич. Сарди дуланмиш шулайи яшлу касар, артухъ фикир тувру кIури, чпин тIагърувал алдапIуз гьар йигъан душваз гъюру. Гьар йигъан 70 кас ипIрубдихъди тямин апIурча. Ва гьамци ляхин гъабхури, ихь яшлуйириз учхьан шлу кюмек, уччву гаф апIури, ипIрубдин, алабхьрубдин кьитвал айи касар кьабул дурарин дерди тамам апIури, лихурача. Хъа ветеранарин месэлйириз асас фикир туври, дурарин игьтияжарра гьуркIрача. Мицисдар касар, ухьу бадали чпин жигьил йисар ва сагъ’вал дявдин женгариъ сарф гъапIдар, ихь терефнаан заан гьюрматназ ва гъайгъу зигувализ лайикь ву», – ктибтнийи Елена Колесниковайи.
