Зубайдат Шябанова
Табасаран райондин Гурихъ ва Гисик гъуларин рякъяр рас апIуз планарик ка.
Улихьнаси Табасаран райондин глава Мягьямед Къурбановди къайд гъапIганси, «Гурикский сельсовет» гъулан поселениейин Кьялан ва Булагъдин кючйир ва Гисихъ гъулан Гискарин кюче бинайиан рас апIуз «Ерли жягьтлувалар» проектдин дахилнаъди РД-йин экономикайин артмиш’валин министерствойин 2026-пи йисан гъабхру конкурсдиз адагъну.Кьюбиб гъуларин агьалйир думу проектариин гизаф рази гъахьну.
Гурихъ гъулан улупнайи кючйир асас кючйир гьисаб шула, ва думу рякъяриъ мектеб, бицIидарин багъ ва гъуларин администрация ерлешмиш духьна. Хъа Гисик гъулан Гискарин кючейиъ саки саб километр манзил а, ва думу ХючнаЖулжагъ рякъюк кабсра. Гурихъ гъулаъси, Гисик гъулан асас кючейиъра мектеб ва гъулан мист а.
Гурихъ гъулан рякъяр рас апIуз проектдиинди 6,8 миллион манат ва Гисик гъулан рякъ къайдайиз хуз 5,8 миллион манат харжар удучIвиди. Конкурсдин шартIариинди, расвалин ляхнариз республикайин ва муниципальный бюджетарин дакьатарилан гъайри, меценатарин иштирак’валра ади ккунду. Дурари кивру пай проектдиъ улупнайи харжарин кьадарнакан 30%-тIан исина дубхьну ккундар.
Улихьнаси Мягьямед Къурбановди рякъяр рас апIрудар пишекарвалин йигъахъди тебрик апIури, райондиъ аьхиримжи йисари рякъяриъ гъахьи дигиш’валарикан ктибтнийи.
«Табасаран райондиъ вари рякъяри 800 километр манзил дибисна. Рякъяр рас апIрударин зегьметниинди аьхиримжи 6 йисан 130 километр рякъ’ин асфальт улубзна, 300 километр рякъ лазим вуйи къайдайиз дубхна.
Аьхиримжи вахтари райондин рякъярихъди аьлакьалу вуйи важиблу проектар арайиз адагъурахьа. Мисалназ, кьюд йисандин арайиъ Хючна-Хьарагъ рякъюн 7-11-пи километр рякъюн пай, федералин мяна айи «Кавказ»-СиртIич-ТIаттил рякъюн ЦIанак гъул’ан Бургьанкентдиз, гьадму рякъюн Бургьанкентдиан Хюряхъ гъулаз вуйи рякъяриин асфальт улубзунхьа. Му цирклиан гележегдиъра гъахру хайлин ляхнар ихь улихь дийигъна», – гъапнийи райондин главайи.
Ав, Мягьямед Къурбанов дюз ву. Аьхю проектарилан гъайри, райондин гъуларин рякъярра рас апIбан ляхнар гьар йисан гъахурайивалин шагьидар шулахьа. Мисалназ цци ТIивак, Ругуж гъуларин рякъяр рас гъапIну.
Багарихьди зиихъ гъапи Гурихъ ва Гисик гъуларилан гъайри, Хючна, ГьепIил, ТIаттил гъулариъра рякъяр рас апIиди.
Шиклариъ: Гурихъ ва Гисик гъуларин кючйир, рас апIайиз
