Зубайдат Шябанова
Библиотекайин гъуллугъчи китабарин вилаятдиъ лихура. Мектебдин библиотекариз, гьарсаб классдиъ швнур бали-шуру урхураш, аьгъяди шулу, фицики гьарсаб цIийи урхбан йисан гьарсаб класс китабарихъди тямин дапIну ккунду. Заан классариъ лазим вуйи китабарин сиягь саки 20 аьдаддиина ву. Гьарсар урхурайирихьна тувру китабарин гьисаб гъабхувал, китабар лазим вуйи вахтна урхурайихьна рукьувал, дурар кьяляхъ кьабул апIувал думукьан гьии ляхин дар. Иллагьки, мурариз туврайи маважибдин кьадарра гьисабназ гъадабгъиш.
Китабар урхбахьна аьшкь бицIивахтнахъанмина дубхьну ккунду. Гьаддиз мектебарин библиотекйирин гъуллугъчйири асас фикир ккергъбан классариъ урхурайи баяр-шубариз туври шулу. Миди бицIидарин аьгъювалар гъадагъбахьна аьшкьра мюгькам апIуру.
Хъа гьяйиф, мектеб аварийный гьялнаъ айиган, дарсар кивуз классар гьуркIри адруган, мектебдин библиотекйир саб жюрейинра шараитар адру бицIи йишвариъ тIаъра. Гьаму жюрейин аьгьвалат Табасаран райондин хайлин мектебариъра арайиз дуфна.
И ч сюгьбатнаъ Табасаран райондин образованиейин управлениейин мектебар китабарихъди тямин апIру гъуллугънан методист Ислам Аьлиевди къайд гъапIганси, райондин вари мектебариъ библиотекйир а, дурари ляхинра лазим вуйи къайдайиинди гъабхура. Амма мектеб аварийный гьялнаъ айиган вая классар ккабалгуз удукьури адруган, библиотекайин месэлйир гъирагъдиъ гъузру.
«Мектебариз китабар жара апIбан месэлайикан улхури пуз ккундузуз, китабар мектебдиъ урхурайи баяр-шубарин кьадарназ дилигну, жара апIурача. Гъубшу йисан ва цци райондин мектебариз дуфнайидар анжагъ тарихдин дарсариз ва 5-8-пи классариз табасаран чIалнан дарсариз вуйи китабартIан дар. Гьацира классдин гъирагъдиъ урхру «Йиз Дагъустан» китаб дуфна. Гьамусяаьт райондин вари мектебарин библиотекйир китабарихъди бегьемди тяминди дар. 2017-2018-пи йисарихъанмина мектебариз китабар лап кьитдитIан гъафундар.
Мушваъ узу райондиъ цIийиди арццнайи мектебарикан кIурадарза. Ав, Туруф ва НичIрас гъулариъ цIийи мектебар арццу вахтна, дурар тамамди китабарихъдира тямин гъапIнийи. Багарихьди Хюрикк гъулаъра цIийи мектебдин раккнар арццру. Му мектебдиз швнуб-саб комплект цIийи китабар хъадаъна. Хъа имбу библиотекйир китабарихъди тямин апIру рякъяр дихъурадарчуз, фицики республикайиъ лазим вуйи кьадар китабар адар.
Ужуб ва тяриф апIру терефарикан улхури, мялум апIуз ккундузуз, райондиъ варитIан ужуди лихурайи мектебарин библиотекйирикан райондин гимназияйин, 1-пи нумрайин лицейин ва АхьитI гъулан мектебдин библиотекйир улупуз ккундузуз. Му библиотекйир республикайин дережайиъ айиб имид гъубзри, уьлкейин аьхю шагьрарин улихь хьайи мектебарин библиотекйиринра кьяляхъ гъузрадар.
ИкибаштIан, думу мектебариъ библиотекйириз ужудар йишвар а, дурар варибдихъди тяминра дапIна. Гьяйифки, райондин вари мектебариз гьацдар мумкинвалар ва шараитар адар. Ляхин асас вуди гьаддилан асиллу шула», – гъапнийи Ислам Аьлиевди.
