Гюльнара Мягьямедова
Дагъустан Этнографияйин аьхю диктантдиз гьязур шула. Акция 10-пи ражари гъябгъюрайиб ву. Дидин гьякьнаан «Дагъустан» РИА-йиъ кIули гъубшу пресс-конференцияйиъ мялумат тувну. Федеральный ва республикайин мялуматарин дакьатарин журналистарин суалариз Урусатдин Игит, РД-йин милли политикайин ва диндин ляхнариз лигру министрин вазифйир тамам апIурайи Темирлан АьбутIалимовди ва Вариурусатдин гьюкуматдинна жямяаьтлугъдин «Урусатдин халкьарин Ассоциация» тешкилатдин Дагъустан региондин отделениейин председатель Зикрула Ильясовди жавабар тувнийи.
«Ихь уьлкейиъ яшамиш шулайи халкьарикан, дурарин культурайикан ва аьдатарикан аьгъю апIуб гьарсар касдин буржи ву. Гьаддиз акцияйин метлеб уьмуми Урусатдин халкьарин аьдатарикан ктибтуб, ихь сатIи вуйи тарихдик тягьна кипуз гъидритуб ву», — гъапнийи Темирлан АьбутIалимовди.
Къайд апIурача, «Этнографияйин аьхю диктант» Урусатдин вари субъектариъ ва харижи уьлкйириъ гъябгъиди. Думу диктант 1-пи ноябриан 9-пи ноябризкьан давам хьибди. Дагъустандиъ диктант акцияйин садпи йигъан сяаьт 11-ди ккебгъди.
Жвуван аьгъювалар www.miretno.ru сайтдиъ регистрация дапIну онлайн къайдайиъдиси, республикайиъ ккабалгнайи 4 майдандикан сабдиз душну, гьашваъра улупуз шулу. Думу майднар Мягьячгъалайиъ Этнический культурайин центриъ, Кизлярин Жигьиларин культурайин центриъ, Кизлярин 8-пи нумрайин мектебдиъ ва Гуниб райондин кьялан библиотекайиъ ачмиш апIиди.
Жвуван аьгъюваларин дережа тяйин апIуз ккуни касди 45 дакьикьайин арайиъ 30 суалнакан ибарат вуйи тестариз жавабар тувну ккунду. Вари суалариз дюзди жаваб тувдариз 100 балл дивру. Натижйир 12-пи декабри, Урусатдин Конституцияйин йигъан, мялум хьиди. Диктантдин иштиракчйириз сертификатар тувди.
КIваина хурача: акция Урусатдин Президентдин тешкиллувалиинди гъабхурайи Варихалкьдин «Урусатдин ва СНГ-йин халкьар» фестивалин серенжемарин программайиз гъадабгъна.
Сабпи ражари диктант 2016-пи йисан Удмуртия Республикайин милли политикайин министерствойин ва Удмуртияйин жигьиларин тешкиллувалиинди гъубхнийи. Гьаддихъанмина диктантдин иштиракчйир яшамиш
шулайи йишвар ва чпи иштиракчйир артухъ шула. Ккудубшу йисан этнографияйин диктант 3,5 миллион касди гъибикIнийи.
