Зубайдат Шябанова
Улихьна йигъари Дагъустандин вакил Ислам Мягьячев, дюн’яйин варитIан машгьур вуйи UFC-йин талитариъ гъалиб гъахьну. Жвуван ватандиан вуйи жигьил варитIан заан дережайин талитариъ гъалиб хьувал – му, кIулди республикайизси, вари Урусатдизра аьхю хъуркьувал ву.
Му талитарин кьяляхъ узу UFC-йин тарихдиъ табасаранар гъахьнуш, вая гележегдиз гьацдар хъуркьувалар улупурайи жигьилар аш суалар хьади гьацира Табасаран райондиъ махлукьатлу спортдин артмиш’вал фициб гьялнаъ аш гьерхри, Табасаран райондин Кьалухъ Мирзайин ччвурнахъ хъайи спортдин дараматдин бицIидаринна живанарин спортдин 3-пи мектебдин кIулиъ айи Садикь Уьсмановдихьна илтIикIунза.
«ИкибаштIан, Дагъустандин баяри вари дюн’яйин аьхю талитариъ гъалибвалар гъадагъруган, кIваз хуш шулу. Дурари, республикайиъ спорт артмиш апIурайивалихъди сабси, ихь культура, дин, аьдатар, тербия, аьхюр-бицIириз гьюрмат айивал вари дюн’яйиз ашкар апIура.
Гьарсар тренериз дюн’яйиз машгьур спортсменар тербияламиш апIуз ккунду. Хъа, гьяйиф, варидариан думу ляхин удукьудар. Ужудар хъуркьувалар ва мумкинвалар айи спортсменар гьязур апIуз улихь кьаст дивну лихурайи тренерар ихь райондиъра хайлиндар а. Амма, тренерихъди сабси, спортдин гьаму деврин инфраструктурара ади ккунду. Дюзди гъапиш, райондин спорткомплекс сабдинра кьяляхъ гъубзрадар. Юкьяр дисуб, волейбол, бокс, ушу-саньда, гъагъи атлетикайин ва спортдин жара жюрйир райондиъ мюгькамди артмиш шула. Вушра, спортдин дараматдиъ инвентарь цIийи алапIну ккунду.
Гьацира райондиз ужудар тренерар гьуркIрадар. Заан дережайин тренерариз маважибра ужуб ккунду. Хъа бицIи маважибдихъди лихуз ужудар тренерар гъюрдар. Спортдин цирклиз инвесторар жалб апIбаъра читинвалар алахьура.
Ислам Мягьячевдикан улхуруш, думура дагълу гъулан бай ву. ДумутIанна гъайри, БотIлих райондиан вуйи баяр Урусатдин хоккейин суперлигайиъ айи Новосибирскдин «Локомотивдиз» гъадагъну. Гьадрарра ихьдарсдар шараитариъ тербияламиш гъахьидар ву. Гьаддиз ачухъди кIурза, хъуркьувалар, шараитариланси, жигьиларин мумкинвалариланра, гьевесналанра асиллу шула.
Табасаран баярин жергейиъ аьхиримжи йисари юкьяр дисбаан Европайин кьюр чемпион духьна. Гьяйифки, дурарин хизанар райондиан жара йишвариз кюч гъахьну. Гьацира ММА-йиан Мартин Сефербеговдин хликк аьгъювалар гъадагъурайи жигьилар Урусатдин дережайин талитариъ иштирак шула, ва хайлиндари заан йишвар гъазанмиш дапIна. Дурари райондин Гьямид Гьямидовдин ччвурнахъ хъайи спортдин мектебдиъ урхура…», ктибтнийи Садикь Уьсмановди.
– Аьхиримжи йисари Табасаран райондиъ спортдин цирклиз аьхю фикир тувра. Райондиъ саки гьар вазли аьхю талитар ва серенжемар гъахура. Мисалназ, цци Нариман Шихялиевдин гьюрматназ ММА-йиан вари Дагъустандин Кубок, Кьалухъ Мирзайин гьюрматназ волейболиан Дагъустандин Кубок, гьацира Аьлимягьямад Уьсмановдин, Рамазан Исрафиловдин, Эмирбег Мягьямадбеговдин, Руслан Къурбановдин гьюрматназ волейболиан, юкьяр дисбаан ва жара жюрйириан Дагъустандин чемпионатар гъухунча. Ноябрин 29-30-пи йигъари Ватандин Аьхю гъалибвалин 90 йис хьпаз ва хусуси метлеб айи дявдин операцияйиъ чпин жанар туву эскрарин рюгьяриз бахш вуди республикайин волейболин талитар гъахбахьна гьязур шулача. Душваъ ихь региондин варитIан улихь хьайи Табасаран, Хунзах, Хасавюрт районарин, Мягьячгъала шагьрин, ДГТУ-йин, ДГУ-йин волейболин сборный командйир иштирак хьиди.
Табасаран райондиъ гъягъру талитариз Дербент, Дагъустандин Огни, Мягьячгъала, Буйнагъск, Каспийск шагьрариан ва кьибла Дагъустандин саки вари районариан спортсменар гъюру. Мидланра савайи, райондиъ гъушу ММА-йиан Дагъустандин Кубокдин талитариъ Кабардино-Балкария ва Чечен республикйириан спортсменар иштирак гъахьнийи. ИкибаштIан, спортдин талитариз пулин хайлин дакьатар лазим ву. Дурариз райондин администрацияйи ва спонсорари кюмек тувра», – давам гъапIнийи Садикь Уьсмановди спортдин цирклиъ багъри райондин хъуркьуваларикан ихтилат.
Йиз сюгьбатчийи къайд гъапIганси, Табасаран райондиъ юкьуб спортдин мектеб а. Дурар вари Хючнаъ Кьалухъ Мирзайин ччвурнахъ хъайи спортдин дараматдин бинайиин лихура. Сабпи нумрайин спортдин мектебдиъ пучIу ва гъагъи атлетикайиан ва ГТО-йин нормативарин комплексдихьна гьязур апIбаан аьгъювалар тувра. Шубубпи нумрайин мектебдиъ – волейболиан, юкьубпи нумрайин мектебдиъ – юкьяр дисбаан аьгъювалар тувра. Сабсана спортдин мектеб Гьямид Гьямидовдин ччвурнахъ хъайиб ву. Душваъ ММА-йин кчIихбарин жюрйириан спортсменар тербияламиш апIура.
«Август вазли Дагъустандин сарпи президент Муху Аьлиевдин гьюрматназ волейболин талитар гъахьнийи. Душваъ иштирак гъахьи Табасаран райондин сборный командайин дахилнаъ айидар вари Табасаран райондин вакилар вуйи. Муганайиз Табасаран райондин сборный командайиъ айир анжагъ сар табасаран байтIан вуди гъахьундар. Сентябриъ Дагъустандин халкьарин спартакиада гъабхьну. Думу талитариъра ихь командайи кьюбпи йишв гъадабгъну. Мидланра гъайри, райондин живан баяри ва мектебарин волейболин командйири ужудар хъуркьувалар улупура. Мисалназ, райондин турнириъ 2009-2010-пи йисари бабкан гъахьидари — шубубпи йишв, 2010-2011-пи йисариндари — кьюбпи ва 2013-пи 2014-пи йисари бабкан гъахьидари сабпи йишвар гъадагъну.
Гьацира райондиъ волейболиан шубарин сборный командара а. Улихьнаси Табасаран райондин Хюрикк гъулан мектебдиъ урхурайи шубарин командайи волейболиан Республикайин мектебарин футболин лигайиъ кьюбпи йишв гъазанмиш гъапIну. Му талитарин муниципальный этапдиъ райондин 400-дихьна урхурайидар иштирак гъахьнийи. Миди райондиъ волейбол ккуниваликан ва думу уйнамиш апIуз аьшкь айидарин кьадар артухъ шулайиваликан кIура», — къайд гъапIнийи 1-пи нумрайин мектебдин директори.
Садикь Уьсмановди, райондиъ спорт артмиш апIбак аьхю пай киври, баркаллуди зегьмет зигурайи хайлин бажаранлу тренерарин ччвурар ктухну. Дурарин арайиъ волейболин тренерар Рамазан Ибрагьимов (Хюрикк гъул), Закир Шихмягьямадов (Дагъни гъул), Даниял Гьяжиев (АхьитI гъул), Муса Мадаев (Хянягъ гъул), футболиан – Агъариза Аьлиризаев (Хючна гъул), Надим Исмяилов (Хюрикк гъул), Низами Мягьямадов (Хючна гъул), Альберт ТIагьиров (ЦIийи Лижва гъул), юкьяр дисбаан – Мурад Аьзизов (Гурихъ гъул), ТIагьир Нуров (Цалак гъул), Закир Гюлов (Даттил гъул), ушу-саньдайиан – Назим Гьяжиев (Хюрикк гъул), Рамазан Къурбанов (Хюрикк гъул), ММА-йин жюрйириан Мартин Сефербегов (ЧвулатI гъул) ва жарадар айи.
Садикь Уьсмановди, райондиъ аьхиримжи вахтна спортдиз аьхю фикир тувра гъапи гафар гьякьлудар вуйиб райондиъ спортдиан гъахурайи аьхю серенжемари тасдикь апIура. Хъа вушра, узу саб далилин шагьид шулаза: улихь-кIулихь хьайидари фукьан серенжемар гъухишра, республикайин авар районарик тевган, Табасаран ва Хив районарин спортдин улихь гъягъюрайи жигьилар лап кьяляхъ хъами.
