Мейлан Нежефов
Ихь гьюкуматдин машкврарин арайиъ, ноябрин аьхиримжи йигъари къайд апIру Дадайин йигъу лайикьлу йишв дибисна. Му машкврахьинди вижнасузди илтIикIрур адар, гъапишра, кучIал даршул.
Ихь гьарсарин уьмриъ дадайи аьхю роль уйнамиш апIура. «Дада» кIуру гафнаъ гьаму дюн’яйиъ айи вари ужуб убшру гъапишра, гъалатI даршул. Му гаф гьар бицIири сабпи ражари дубгъурайи гаф ву, думу фуну чIалниинди кIурашра, гьарган аьхю гьюрматниинди, ккунивалиинди кIура. Фукьан гъайгъушнар алахьури шулушра, дадайин хилартIан гъюдлидар, манидар сарун гьич дидрихъур. Дугъан гьадму назук хилари гъубжу уьлин дад сар веледдира гьадрахур. БицIир аьхю гъахьи вахтнара дугъан уларихь гьарган дадайин сурат гьугъубжвура, дугъан сес гъеебхьган, кIваз рягьят ва жандин кьувват артухъ шулу.
Му жикъи гафнаъ айи манишну, дадйирихьна вуйи ккунивали, дурар гьар вахтна кIваъ ади шлували гизаф шаирар дурариз чпин эсерар бахш апIуз гьевеслу апIура.
Улихь йисари ихь дадйириин фукьан вушра читинвалар алахьуйи. Гъийин вахтнаси, ихь дагълу гъулариъ гъулайвалар адайи. Думу вахтар кIваина хури, ихь бажаранлу шаир, шубур веледдин дада Эльмира Аьшурбеговайи чан шиъриъ гьамци бикIура:
Гвар кьял’инди, гъурччу палтар хиликкди,
Тяди кади гъюйва узнакканзина –
Гьаци, аьхю хизан алди, гъагъдиккди
Уьбхюрайва марцци асулин бина.
Му шиир ккудубкIури, учвра гьарган чан аьхю хизандин гъайгъушнаъ шлу шаир–дишагьлийи шиърин цIарариинди гьамциб суал тувра:
КкарцIуз гьалварна халачйири хулар
Фици хъуркьри гъахьний яв дири хилар?!
Ав, гьадму вахтназ хътакури, дадйирикан кIурайи шаирарин фикрарра сар-сариндарихъна гъушдарстар шула. Мисалназ, учвра шубур веледдин дада вуйи, гьар вахтна чан хизандин гъайгъу зигурайи бажаранлу шаир Сунаханум Гьяжикъурбановайи «Йиз табасаран дишагьли» кIуру шиъриъ дадайин гьякьикьи сурат тувна:
Гьар ляхниъ уста вуй табасараншив,
Аьгъдай дугъаз фициб шулуш тIагърушин.
Ликрихъди дабкьури бицIир кайи шинт,
Хиларихъди убхуй уткан халачи…
Гъийин девриъ думукьан гъагъи гъайгъушнар имдаршра, дадйир чпин веледар бадали гизаф чалишмиш шула, му сикинсуз деври дурарин юкIвар архаин хьуз гъитрадар.
Веледдин фукьан яшар гъахьишра, дадайиз думу набалугъ ву. Гъит чIатар-чIурариъ гьунарар улупурайи баяр сагъ-саламатди дуфну, ихь дадйир архаин ишри. Ихь вари дадйир му машкврахъди тебрик апIури, дурариз жандин сагъвал, кIул’ин укIу зав, аку ригъ, вари ляхнариъ хъуркьувалар, ва гьаму дюн’яйиъ айи ужувлар ккун апIурхьа!
