Гюльнара Мягьямедова

Гьар йисан 5-пи декабри Урусатдиъ волонтерарин йигъ къайд апIуру. Машквран метлеб волонтерарин ляхнихъди таниш апIуб, жямяаьтлугъдиз пулсуз кюмек туврударин кьадар артухъ апIуб ву. Волонтер хьпан бадали, инсан жарарин язухъ зигуз шлу юкIв айир, читинвалиъ айи инсандин аьрзйирихъ хъпехъуз шлур, сабурлур вуди ккунду. Волонтерар тек-бирра сарди лихури шулдар, дурари дестйириинди ляхин апIуру. Урусатдиъ волонтерарин, яна пулсуз кюмек туврударин аьхю тешкилатар а.

 

Волонтерарин ччвурар гьаммишан «сирниъ» ашра, дурари апIурайи ужудар ляхнар варидариз рякъюра. Къайд апIурайи йигъахъди аьлакьалу вуди, волонтерарин ляхникан ктибтуб ккун апIури, учу газатдин редакцияйиз «Дианайихъди уж’вал апIин» проектдин кIулиъ айи ихь ватанагьли Диана Уьсмановайиз теклиф гъапIунча. Дугъахъди гъубху сюгьбат исихъ туврача.

– Диана Аьбдулягьядовна, уву проект уьмриз кечирмиш апIруган, пулин ваъ, хъа чпин иштираквалин кюмек туврударикан ктибтуб ккун апIураза.

– Ав, 5-пи декабри Урусатдиъ жвуван хушниинди кюмек туврударин йигъ къайд апIуру. Гьадму йигъахъди аьлакьалу вуди, йиз проект уьмриз кечирмиш апIуз кюмек тувру волонтерар уч дапIну, дурариз чухсагъул мялум апIбанди вуза. Дурар хътарш, ляхин гъабхуз шулдар.

Проект уьмриз кечирмиш апIури (2016-пи йисхъанмина) саки 10 йис вуйиз. Гьаму вахтнан арайиъ яваш- явашди уч шули, гьамус 47 волонтер азуз, дурарин, узухъди лихури, 7-8 йис ву. Гизаф вахтна сатIиди ляхин апIурайи дурариз йиз кIваъ айи фикрариканра хабар а. Дурариз фу-вуш табшурмиш апIубра лазим дар, варибдин дишлади гъаври шулу. Автоклубарин кIулиъ айидар йиз ужудар кюмекчйир вуйиз.
Дурари гъагъи уьзриан аьзарлу духьнайи бицIидар учу серенжем тешкил апIурайи йишвахьна гъахуз, кьяляхъ хуз транспортдин кюмек апIура. Волонтерарин арайиъ медицинайин пишекрар, косметологар, духтрар, аьдати дишагьлийир, студентар, бизненсдихъ хъайидар ва жарадар а.
Дурар наънан агурава, кIури гьерхрава. Узу серенжем гъабхурайиваликан дурариз мялумат ебхьуру. Дишлади йиз телефондиз зенгар апIуз хъюгъру. Дурари, учузра уж’вал апIуз ккундучуз, йип, фу дапIну ккундуш, кIури шулу. Узу дурариз флану йишвахьна гъачай кIури, теклиф апIураза. Улихьна кюмекчйир цIибтIан адруган, варидариз дих апIуйза. Гьамус дици апIури имдарза. Узухьна гъафидаригъян бажаранвал кайидар гъядягъюраза. Телефондиъ кюмекчйирин десте айиз. Дурар кьялан яшнан, хизандин кIулиъ айидар, дапIну ккуни ляхнин гъавриъ айидар ву. Чпин вари ляхнар дирчну, кюмекназ гьялак шулу. Учуз ляхнин жавабдарвал гьисс апIрудар лазим вучуз.

– Аьзарлу бицIир гъяркъган, кIваз гъагъи тясир апIру инсанар шулу. Волонтерарин арайиъ гьацдар гьиссар айидар шулин? Увухъди лихури миржид йис вуйидарин юкIв ижми дубхьнашул?

– Онкологияйин уьзур кайи бицIидар айи йишваъ варитIан гъагъиди шулу. Бязиган, узухъди кюмек апIуз гъафи аьхю жиларихьанра аьгь апIуз шулдар, уларилан нивгъар гъягъюру. Узу дурарихъди ляхин гъабхураза. «Ухьуз варидариз дурарин язухъди вухьуз. Хъа ихь метлеб ярхи йигъди больницайиъ юкьуб цалтIан рякъюри адру аьзарлу духьнайи бицIидариз жикъи вахтназ вушра чпин уьзрикан гьархуз, инчI ккадапIуз гъитуб, чпикан варидари фикир апIурайивал, чпи варидариз ккундайивал улупуб вуйихь», – кIури, ктибтуруза дурариз.
БицIи вахтнахъанмина сакьат бицIидарикан улхуруш, дурар гьаммишан хулаъ ади шула. Дурарихьан мина-тина гъягъюз, чпин тай бицIидарихъди тамшир апIуз шуладар, дадйирра, гьадрарик китIнайидарси, дурариз хъайивал апIури дусна. Ухьуз язухъди вушра, дицисдар бицIидариз ихь нивгъар улупну ккундар. Узу волонтерариз ишуз ихтияр туврадарза, хабар алдагъури, аьлхъбар ккаъри, шадди вахт адапIуб ич метлеб вуйич.

– Абйир-бабар хътру сакьат бицIидарра ашул. Ичв серенжемариъ гьацдар иштирак шули айин?

– Бахтнаанси, адашра дадара хътру бицIидарин арайиъ сакьатдар лап цIибтIан адар. Ихь республикайиъ дицисдар бицIидар уьрхюрайи бицIидарин кьюб халтIан имдар: Избербашдиъ ва Буйнакскдиъ. Избербашдиъ айи бицIидарин хулаъ 30 бицIир, хъа Буйнакскдиъ уьмрин гъагъи аьгьвалатнаъ айи хизанариан вуйи сагъу бицIидар ва цIиб кьадар сакьат бицIидар а. Учу дурарик кучрадарча. Учу уч апIурайидар адаш-дада хъайидар ву. Гъийин йигъаз ич гьисабнаъ 650 бицIир айич.
Серенжемариз хъади гъягъруган, саб жюре уьзур кайидар гъядягъюри шулча: сабан аутизм, Даундин уьзур кайидар, хъа ражари бицIидарин церебральный паралич вуйидар, шубубпи ражари онкологияйин уьзур кайидар. Сабишв’индии дурарин варидарин эйвал апIуз лап читинди алабхъуру.

– Саб гафниинди, волонтерари яв проект уьмриз кечирмиш апIбак лайикьлу пай кивра?

– Ав, волонтерарин кюмек аьхюб ву. Узу сарра мажбур апIурадарза, фицики дурарин ляхин жвуван хушниинди апIруб ву. Эгер инсандиз уж’вал апIуз ккундарш, думу гьаз мажбур апIурухъа?! Узу чпин хушниинди кюмек апIуз ккунидариз майдан ачмиш апIураза. Варидарин хасиятра сабсиб шулдар, волонтерар сабурлудар, апIурайи ужувлан гъаври айидар, чан хусуси вахтнакан жарариз вахт жара апIуз шлудар духьну ккунду. Волонтерарин жандизра ва кIулизра гъагъ алабхъуру. Эгер гьадму гъагънакк хяв ккивуз ккундарш, дугъу гъапIу ляхин батIул шулу.
Узу серенжем планламиш апIруган, телефондиъ айи 47 волонтерин дестейиз бикIураза: улупнайи йигъан, гьамциб кьадар бицIидарихъди, гьамциб йишвахь серенжем гъабхбанди вуза, узухъди кюмек апIуз гъюз шлударин сиягь гьязур апIинай. Гьаммишан сабси шулдар. Гьаму ражари гъафидариз хъа ражари гъюз мажал адарди хьуз мумкин ву. Дурарин гъавриъ духьну ккунду.
28-пи августди бицIидарин варитIан чIатху десте уч гъабхьнийич. Думуган Палестинайин бицIидар хъади гъягърубдикан аьгъю гъабхьиган, 50 волонтер гъафнийи. Учу 35 машиндиъди «Главрыба» туркомплексдиз гъушнийча. Думугандин дестейиъ волонтерар ктарди 98 кас айи.
Волонтерарихьна асас тIалабарра айич: дишагьлийирин кушар уч дапIну, жилилан хъчIюрхру палтар ваъ, хъа бицIидарихъди рягьятди ляхин апIуз шлудар, юкьвлан зина лизи рангнан, асина – мучIу рангнан палат алди, ликариин алидарра ягъли швякьяр ккадрудар, тIубариин али шибар жикъидар хьуб. Банкетдин залариъ серенжемар гъахруган, волонтерариз алахьру саб кIалибнан футболкйир ачуз.

– Диана Аьбдулягьядовна, ужувлан ляхнар апIури гизаф йисар вуяв. Ляхнихъдира ужуди таниш духьнава. Рягьимлувалин фонд, ясана устав айи саб тешкилат гьаз ачмиш апIурадарва?

– Магьа гьадму месэлайихънара дуфнахьа. Гизафдари гьациб суал туври гъахьнийиз. Йиз волонтерарира ккун апIури гъахьну. Йиз гъабхурайи ляхнин улихь дивнайи метлебра гьациб вуйиз. Магьа цIиб вахтналан, гьаму йигъари гъапишра шулу, автономный коммерцияйин дару «Дианайихъди уж’вал апIин» кIуру ччвур тувнайи, регистрация дапIнайи, банкдиъ счетра айи тешкилат ачмиш апIурача.

– Яв цIийи ляхнар мубарак ишри, ужувлан ляхнар кIулиз адагъуз Аллагьди хъана артухъ кьувват тувривуз.