Гьюрматлу ватанагьлийир, ихь газатдин улдукьу дустар!
Улубкьурайи ЦIийи йисахъди учву марцци кIваан тебрик апIурача! Учву гьар йисан ихь газат подписка апIури, думу урхури, учухъди аьлакьа уьбхюрайивализ чухсагъул кIурача.
Гъийин девриъ гизафдар цIийи мялуматарихъди социальный сетариъ таниш шула. Учура социальный сетариъ ача, шлубкьан ухди учвухьна мялуматар рукьуз цIийи рякъяр агурача. Вушра, улихьдин вахтарисикьан дашра, газатарра ихь арайиъ ими. Газат, думу улариз рябкъюри, гьарсаб текст фикриз гъадабгъури урхуз мумкинвал тувру дакьат ву. Урхбахъ юкIв хъайи инсан гьаммишан газатдин цIийи нумрайиз ккилигури шулу. «Табасарандин нурар» газатдиъ мялуматарин жара дакьатариъ затра адру, багъри табасаран чIалниинди дидикIнайи, ухьуз таниш инсанарикан материалар ади шулу.
Гележегдиъра газатдин машариъ политикайин, экономикайин, районарин, гъуларин артмиш’валин, спортдин, туризмйин ва хайлин жара мялуматар хьиди. Гьаддиз, газатдин гьарсаб нумрайиз ккилигурайи ихь ватанагьлийириз 2026-пи йисан газат хъана маракьлуб апIуз гаф туврача.
Гьюрматлу юлдшар! Улубкьурайи ЦIийи йисан учвуз, сабпи нубатнаъди, мюгькам сагъвал, хушбахтлу уьмур ккун апIурача! Гъит 2026-пи йисан ихь гьарсарин кIваъ айи мурад-метлебар тамам ишри, гъит гьарсаб хизандиъ мясляаьт, берекет артухъ ибшри. Хъа варитIан асасуб – Первердигар Аллагьдин амриинди, хусуси метлеб айи дявдин операцияйиъ айи ихь эскрар, гъалибвалра хьади, сагъ-саламатди кьяляхъ гъюри.
Улубкьурайи 2026-пи йис мубарак ибшри!
«Табасарандин нурар» газатдин коллектив
