Гюльнара Мягьямедова
16-пи январи Дагъустандин глава Сергей Меликовди Дербентдиз ва Дербент райондиз гъушну. Региондин кIулиъ айир яшайишдин объектариз гъилигну, агьалйирихъди гюрюшмиш гъахьну, гьюкмин органарин вакиларихъди Дербентдин артмиш’валин месэлйир гьял гъапIну.
Сабпи нубатнаъди Сергей Меликовди Дагъустандиан вуйи командир, кечмиш гъахьи Эрик Селимовдин багахьлуйириин улукьну ва дурариз теклиф капIну.
Полковник Эрик Селимов ва дугъан машин хъапIрайи Равшан Селимов январин вазли дявдин операцияйин месэлйир гьял апIурайи вахтна, авария дубхьну кечмиш гъахьну. Республикайин главайи кьягьяларин ватан вуйи Дербент райондиъ накьвариин кюкйир дивну. Дугъу Эрик Селимовдин багахьлуйирихьна (дурар Табасаран райондин Курккак гъул’ан удучIвну гъафидар ву) иггитрин «Кьягьялвал улупбаз» медаль тувну. Дагъустандин Главайи Эрик Селимовдин адаш Анвар ва дада Умият Селимовариз ва дугъан ачIни гъахьи хпириз башсагълугъвал ккун гъапIну.
«Эрикдиз гьарган кIурийза: Дагъустандиз гъюруган узуз зенг апIин, ухьу гюрюшмиш хьидихьа. Думу гъафиган, награда йиз хилариан дугъахьна тувуз ккайза. Командир йикIбан гьякьнаан вуйи чIуру хабар лап гъагъиб гъабхьну. Гьамус узу дугъан улихь йиз буржи тамам апIураза. Гъит гьаму награда лайикьлу командириз вуйи гьюрматнан лишан ибшри», – гъапну Сергей Меликовди.
Региондин кIулиъ айири учв полковникдихъди фици таниш гъахьнуш ктибтнийи.
«Узуна Эрик таниш духьну гизаф вахт дайич. Гизаф ужур, сюгьбат гъабхуз рягьти хасиятнан командир вуйи. Дявдин операцияйин месэлйир гьял апIуз бригадайиз фициб кюмек лазим вуш, дишлади гьял гъапIнийча. Дугъу чан хиликк ккайи эскрарин хатIасузвал уьбхру жюрейин месэлйир сабпи нубатнаъ дерккнийи. Эрикди деврин техникайин варитIан улихь душнайи мутму ккун гъапIундайи. Командири чан бригадайин эскрар аьжалихьан ярхла апIуз мумкинвал тувру яракьар ккун гъапIнийи. Гьяйифки, гизафси чпин хиликк ккайидарин уьмрар уьрхбан бадали, командирар чпи уьмрихьан шула», – гъапнийи Сергей Меликовди.
Дагъустандин главайи ерли мектебдиз игитрин ччвур тувбан ва ядигар дивбан теклиф дивнийи.
Эрик Селимовди военный училище ккудубкIну, дявдин жюрбежюр частариъ взводдин командирилан батальондин командириина гъуллугъ гъабхури гъахьну. Думу, эскервалин буржи тамам апIруган улупу кьягьялвализ лигну, жюрбежюр медалариинди лишанлу дапIнайи.
