Гъи вари дюн’яйиъ COVID-19 уьзур тIягъвниз илтIибкIна. Думу бедбахтвал Урусатдизра гъафну. Гъийин йигъаз (9-пи апрель) дид’ан аьзарлу гъахьидарин кьадар 10 агъзартIан артухъ дубхьна. Уьзур тарабгъбаан сабпи йишв’ин Москва ал, хъасин Московский областдиъ ва Санкт-Петербургдиъ гизаф инсанар аьзарлу духьна.
Гьаму йигъари узу Санкт-Петербург шагьрин Александровский больницайин 1-пи хирургияйин отделениейин заведующий, ихь ватанагьли Шамсудин Шихмягьямадовдихьна илтIикIуз ният гъапIнийза. Дугъкан учу цIиб улихьнасира «Табасарандин нурар» газатдиъ макьала чап гъапIнийча. Амма узхьан ихь духтрихъди гюрюшмиш хьуз гъабхьундайзухьан, фицики думу больницайин багарихьиндикьана сар касра деетури адайи. Думу больницайиз коронавирус кайи аьзарлуйир кьабул дапIнайи. Хъа Шамсудин Аьбдуллаевич йигъ-йишв дарпиди гьадушваъ лихури, миржибпи сутка гъябгъюрайи. Ляхниъ саб астакан чай убхъузкьана азад вахт гьубкIри адаршра, дугъу узухъди сюгьбат гъабхуз вахт гъабгну. Амма ич сюгьбат телефондихъан гъабхьнийи.
– Узуз сюгьбатнан эвелиъ сабпи нубатнаъди, вирус айивалихъ хътругъри, Интернетдиан жюрбежюр роликар гьязур апIури ва далил адру, мянасуз мялуматар тарагъурайи касарихьна илтIикIуз ккундузуз. Учвкан телевизориз лигуб ккун апIураза. Италияйиъ, Францияйиъ, США-йиъ, Китайиъ фициб аьгьвалат арайиз дуфнаш, фикир тувай. Му вирус ихь уьлкейиъ арайиз гъабхиб вая кадабгънайиб дар. Думу вари дюн’я вуйибси тарабгъна. Гьаддиз, ухьуз ккундушра-ккундаршра, ухьухьнара думу хъубкьну. Хъа айи мумкинваларик ихь умуд кайиган, ихь медицина кюмек тувуз гьязурди вуйиган, фунуб-вушра читинвалиан удучIвуз рякъяр гьииди дихъуру. Эгер духтрар гьязурди дарш, аьгьвалат лап гъагъиб хьибди, асас вуди дагъустандин хялар кьабул апIуз ккуни ва аьхю мажлисарин терефкрар вуйи халкьариз. Му ляхнар вари вахтназди дерккну ккунду.
Гъи гьюкмин кIулиъ айидари хулаъ гъузай кIурайивалин асас метлеб анжагъ саб ву – коронавирус тарабгъувал дебккувал, аьзарлу шулайидарин кьадар ис апIувал, духтрариз аьзарлу касар кьабул апIуз ва чарасуз вуйи сабпи кюмекар тувуз мумкинвалар артухъ апIувал. Гьаддиз уьлкейин гьюкмин вакиларин теклифар ва тIалабар саб жюрейинра къаршувал адарди кьабул дапIну ккунду. Мялум дару касари туврайи мялуматарихъ, кучIлин хабрарихъ мухъугъанай. Узу учвуз духтриси кIураза, уьзур тарабгъура, аьзарлуйирра а.
Ич Александровский больницайикан улхуруш, учу коронавирусдиан аьзарлу духьнайидар кьабул дапIнача. Больница карантиндиз хъябкьна. Аьдати инсанариз ва жара уьзрар кади илтIикIурайидариз дина гъюз ихтияр адар. Аьзарлу духьнайидарин гьякьнаан кьатI’и цифра пуз шулдарзухьан, фицики дурарин кьадар гьар сяаьтна артухъ терефназди дигиш шула. Узу йигънура, йишвнура гьамушваъ лихураза. УдучIвуз ихтияр адарчуз. Узуси, гьаму больницайин хайлин жара духтрарра карантиндиъ а.
Учуз больницайиан удучIвуз ихтияр адаршра, сикин дарди жара больницйирин духтрарихъди аьлакьайиъ ача. Ачухъди пуз шулзухьан – ихь медицинайихьан коронавирус ккабгъуз удукьуру. Йиз Дагъустандихьанра удукьиди кIури, фикир апIураза. Амма агьалйириз духтрарин теклифар ва тIалабар уьрхювал кIваин апIури ккунду. Учу учву бадали лихурача, хъа «учву учу бадали ичв сагъ’вал уьбхяй ва хулариъ гъузай» – гьамциб ву гъи духтрарин гьарай. Хулариъ гъузувалиинди ичв сагъ’вал уьбхидичва. Марццишин уьбхяй, кми-кмиди хилар жикIай. Хизандин, мирасарин багахь хьувал бахт ву. Думу вахт мянфяаьтлуди адапIуз мумкинвалар агай. Учвуз сагъ’вал ва хушбахтвал ккун апIураза, – гъапнийи Шамсудин Шихмягьямедовди.
Духтир гьякь ву. Гьарсар касдин сагъ’вал чан хилиъ а. Хъа гъи варидарихьан чпин сагъ’вал анжагъ ихтиятвал дапIнутIан уьбхюз шулдар. Гъузай хулаъ, ичв ва веледарин сагъ’вал уьбхяй.
