Гьаму йисан хьадукран вахтна Дагъустандиан Урусатдин Яракьлу Кьувватарин жергйириъ гъуллугъ апIуз 4200 ватандаш гъягъиди. Дидин гьякьнаан хьадукран призывдиз бахш дапIнайи пресс-конференцияйиъ РД-йин дявдин комиссар Даитбег Мустафаевди мялум гъапIну.
РД-йин военкомдин гафариинди, РФ-дин Яракьлу Кьувватарин Генеральный штабди Урусатдин 135 агъзур ватандашариз армияйиз гъуллугъназ дих апIуз план дивна, гьадму кьадарнакан дявдин гъуллугъ гъабхру йишвариз Дагъустандиан 4200 жигьил гъягъиди. Къайд апIувал лазим вуки, республикайиан армияйиз гъягъру жигьиларин кьадар гъубшу йисан хьадукра 3000 вуйиш, гьамус думу кьадар 1200-диинди артухъ гъабхьну.
Гьаму йисан, аьхиримжи йицIуд йисандин арайиъ сабпи ражари вуди, республикайиз дявдинна завун кьушмарин жергйириз 120 кас гьаъбан план улупна.
Даитбег Мустафаевдин гафариинди, Дагъустандиан вуйи призывникари дявдин юкьуб округдиъ, гьацира Кафари флотдиъ гъуллугъ апIиди. Гъуллугъ гъабхру вахт айиси гъубзра – 12 ваз.
Призывникарихьна вуйи тIалаба-рикан кIуруш, гьарсар жигьил ахтармиш апIиди. «РФ-дин оборонайин Министерствойин кIулиъ айидарин тIалабниинди, дявдин гъуллугъназ гъягъюрайи гьарсар ватандашдин, дугъан багахьлуйирин тахсиркарвалар апIру дестйирихъди аьлакьа аш, ахтармиш апIиди. Армияйиъ лазим вуйи гъуллугъарин пише гъадабгънайи ватандашар сабпи нубатнаъди Яракьлу Кьувватариз гъуллугъназ гъадагъиди», – мялум гъапIну дявдин комиссари.
Дюн’яйиъ ва ихь уьлкейиъ COVID-19 уьзур тарабгъбахъди арайиз дуфнайи аьгьвалатназ лигну, респуб-ликайин военкомдин гафариинди, гьарсар призывник чан сагъ’вал уьбхюз шлу шей’арихъди тямин апIиди. «Дявдин комиссариатдиъ лазим вуйи вари шей’ар, пишекрар, духтрар а. Гьацира РД-йин Главайин къарарниинди, дявдин комиссариатдиз духтрарин аьлава дестера жара дапIна. Призывникар уч шлу пунктнаъ, жигьилар чпи гъуллугъ апIру йишваз хъуркьайизкьан, дурариз лазим вуйи вари алабхьрубра, ипIрубра а», – гъапну Даитбег Мустафаевди.
Дугъу гьацира, эпидемияйин аьгьвалатназ лигну, районариъ ва шагьрариъ призывдин комиссияйин пунк-тариъ, йишвариъ фициб аьгьвалат шулуш гьисабназ гъадабгъну, ляхин ккебгъуз ихтияр тувна. Хьадукран призывдин сабпи десте дявдин гъуллугъназ гьаувал майдин 20-пи йигъаз планламиш дапIна.
Пресс-конференцияйиъ мялум гъапIганси, республикайин муниципалитетарин призывдин комиссйирин багахь республикайин жямяаьтлугъ 7 тешкилатдин вакиларикан ибарат вуйи жямяаьтлугъ совет арайиз хибди. Думу совет, призывдин ляхин ачухъди гъабхурайивал улупбан бадали, тешкил апIурайиб ву.
Хъана урхай
