Улихьна йигъари Дагъустандин МВД-йин наркотикариин гюзчивал гъабхру Управлениейин гъуллугъчйириз Къарабудагъкент райондиъ наркотикар гьязур ва ишлетмиш йишв ачмиш дапIнайиваликан хабар гъабхьну.
Республикайин МВД-йин пресс-гъуллугънаан мялум гъапIганси, Избербаш шагьриан вуйи, 49 йисаъ айи агьалийи Къарабудагъкент райондин аьтрафариин инсанар яшамиш даршулайи хулариъ, кми-кмиди наркотик кайи сурсатар ишлетмиш апIувал метлеб вуди, наркотикар гьязур ва ишлетмиш апIру йишв ачмиш гъапIну.
Наркотикариин гюзчивал гъабхру гъуллугънан гъуллугъчйири гъуху гьяракатарин натижайиъ наркотикар гьязур ва ишлетмиш апIру йишваъ дурар ишлетмиш апIурайи кьюр кас гъидисну. Му касар айи хулаъ «марихуана» наркотикдин сурсат, ва гьацира наркотик гьязур апIру алатар ва дидик курзру жюрбежюр сурсатар гъидихъну.
Тахсиркрарин гьякьнаан, РФ-дин УК-йин 232-пи (наркотикар гьязур ва ишлетмиш апIру йишв ачмиш апIувал) ва 228-пи (къанунсузди наркотикар уьрхювал, масу гъадагъувал ва жара йишваз гъахувал) маддйириз асас вуди, уголовный делойир ачмиш дапIна.
