2020-пи йисан апрелин 7-пи йигъан Урусатдин Президентди адабгъу указдиз асас вуди, Пенсйирин фондну 3 йис дубхьну адру бицIидариз 5 агъзур манат гъадабгъбан къайдайикан ктибтну. Дидин гьякьнаан идарайин мялуматарин гъуллугъну хабар тувра.

 

 

КIваина хурача, дадавалин капитал гъадабгъуз ихтияр айи вари хизанарихьан, капиталин дакьатар харж дапIнашра, гьаму йисан 1-пи июлизкьан вазлиъ 5 агъзур манат гъадабгъуз шулу. Карантин мялум дапIнайи вахтна туврайи гьаму пули дадавалин капиталин дакьатар кам ва хизандиз гъюру жара пулин кюмекназ тясир апIидар, фицики, эпидемиологияйин гъагъи аьгьвалат арайиз дуфнайивалихъди аьлакьалу вуди, хизанариз пулин аьлава кюмек федералин бюджетдиан тувра.

Апрелин, майин ва июлин вазариъ туврайи кюмек гъадабгъбан бадали, хизандиъ кьюр-шубур бицIир ашра, саб аьрзатIан бикIувал лазим шуладар. Шубуд йис бегьем дубхьну адру вари бицIидариз думу кюмек тувра. Хъа сар бицIир айириз думу кюмек тувра, эгер бицIир 2020-пи йисан 1-пи январилан 1-пи июлиз бабкан гъахьир вуш.
Кюмек вуди туврайи пул гъадабгъбан бадали, хизанариз саки 6 вазлин вахт тувна, Пенсйирин фондну аьрзйир 1-пи октябризкьан кьабул апIуру.

Пул гъадабгъбан бадали, бицIидар айи хизанари ПФР-ин порталиъ ясана «Госуслуги» порталиъ хусуси кабинетдиъ аьрза дибикIну ккунду. Аьрза бикIруган, дадавалин капитал айидариз аьлава документар лазим шулдар, хъа эгер лазим гъабхьиш, думу идарайи чав документ ккун апIиди. Аьрзйир гьацира республикайин Пенсйирин фонднан аьтрафариъ айи идарйирира кьабул апIуру.

Дагъустандин Пенсйирин фондну мялумат тувра: коронавирусдиан гизаф инсанар аьзарлу духьнайивалихъди аьлакьалу вуди, идарайи улихь ккимиди вахт дивнайи ватандашартIан кьабул апIурадар. Агьалйир кьабул апIру вахт, электрондин сервисдин ва Урусатдин Пенсйирин фонднан Дагъустан Республикайиъ айи отделенйирин телефондиз дих дапIну, аьгъю апIуз шулу.