Наргиз Гюлечова

Инсандин кIулиз фициб вушра фикир гъюру. Амма уьмрин саспи гьядисйир марцциди кIваълан гъягъюру, вари кIваинди гъибтуз шулдар. Мисал вуди гъадабгъиш, йисаъ айи 365 йигъкан гьар йигъан фу-вуш саб гьядиса шула, хъа гьаз-вуш гьаммишандиз кIваинди гъузрудар анжагъ шадвалин вая пашманвалин дюшюшартIан дар. Саспи психологари ва илмин вакилари кIурайиганси, коронавирус уьзур айи йисарин вахтар гизафдарин кIваълан гьархну — дурарин кьюд-шубуд йис сад йигъситIан кIваин илимдар. Гьаци хьузра ву.

 

Учухъди ляхин апIури гъахьи гъарашугъ Магьди Аьдиловди кIури шуйи: «Йиз фикриъ узуз герек даршлу мялумат гъибтри шулдарза». Гьадгъу кIуруганси, инсанари чпин фикриъ гизаф мялуматар гъитри имдар. Анжагъ варитIан лазим вуйидартIан…
Хъа гъийин макьала ккудубшу йисандин 365 йигъкан йиз ва бязи инсанарин кIваинди имбу йигъарикан вуйиз. Мисалназ, ккудубшу йисан йиз аьхюну бай Закир, мектеб ккудубкIну, колледжик урхуз кучIвнийиз. Му гьаргандиз йиз кIваин гъубзру гьядиса ву.
Му темайиан узу чахъди сюгьбат гъубху Каспийск шагьрин агьали Муминат Рамазановайи лап разивалиинди ккудубшу йис кIваин апIури, ктибтура:

«Сачдин йис йиз хизандиъ лап шадуб гъабхьнийиз. БицIину балин сумчир гъапIунза, хъа аьхюну бализ велед гъахьнийиз. Пуз ккундузуз, 2025-пи йисан узу сабпи ражари баб гъахьунзу. Хъа мутIан аьхью шадвал ва бахт айиб вуйинхъа?!»
ИкибаштIан, хизандиъ цIийи адми хьувал – му аьхю шадвал ву. Абйир-бабари чпин уьмур, веледар ликриин апIури, дурарин хал ккебгъбан бадали зегьмет зигури адапIура. Амма асас вуди кIваинди гъубзруб – велед гъахьи, думу ликри гъягъюз хъюгъю, силбар удучIву, мектебдиз гъушу, мектеб ккудубкIу ва хал ккебгъу йигъар ву. Гьаз-вуш имбуну уьмур ухди кIваълан гъябгъюру.
Узу чпихьан ккудубшу йис фтиинди кIваин гъубзнуш гьерхдар вари аьдати касар вуйи. Гьаддиз дурари асас вуди кIваин апIурайидар чпин уьмрихъди аьлакьалу вуйи гьядисйиртIан дайи.

Дербентдиан дуфну Мягьячгълайиъ духтирвализ урхурайи жигьил риш Лианайира сач августдин вазли, сар-сариин юкIв улубкьну, учв чан ккуни бализ швуваз гъягъбакан ктибтнийи. Дугъу ккудубшу йисан вари йигъарикан иллагьки гьадму йигъ чан уьмриъ варитIан кIваинди гъубзру йигъ вуйиз кIура.
Шадвална пашманвал чвена чи ву, кIури шули. Ккудубшу йисан гъахьи шадвалин гьядисйирси, пашманвалин гьядисйирра кIваин апIурайи касар гизаф а. Пашманвалин гьядисйир гизафси 4 йисандин арайиъ давам шулайи хусуси метлеб айи дявдин операцияйихъди аьлакьалудар ву. Узу гаф-чIал гъапIу хайлин касари ккудубшу ва дидиз улихьна йисарин саспи йигъар лап дерд кади кIваин апIура. Думу йигъар дурарин хизанарин уьмриъ варитIан пашмандар гъахьну, фицики хусуси метлеб айи дявдин операцияйихъди аьлакьалу вуди дерд-хажалат кудрубкIу хизанар саб-кьюбра имдар. Пашманвали ихь фагьмизра гизаф аьзият тувра.

Каспийск шагьрин сарсана агьали, ФатIимат Давудовайи, ккудубшу йис учв сабпи ражари гьяждиз гъягъбахъди аьлакьалу дапIну, Аллагьдин рякъ’ин али гьадму йигъар кIваин апIури, чаз хъанара гьадина гьягъюз ккунди айиваликан ктибтура.
«Гьяждиз гъягъюб йиз варитIан аьхю мурад-метлеб вуди гъабхьнийиз. Магьа 2025-пи йисан узуз дина гъягъюз кьисматра гъабхьунзуз. Му йисра, марцци ругариин алди гъахьи къанна сад йигъра уьмурлуг кIваълан гьаидарза. Дурар варитIан бахтлу йигъар вуйиз», – гъапнийи дишагьлийи.
Гьюрматлу газат урхурайидар, хъа ичв ккудубшу йисандин варитIан кIваинди гъубзру гьядиса фу вуйичв?