Зубайдат Шябанова
Стоматолог духтрихьна инсан анжагъ силбар иццру гъахьигантIан илтIикIури шулдар. Хайлин дюшюшариъ силбарин гьялну инсандин уьмриъ аьхю роль уйнамиш апIура. Стоматология гъи иццурайи силиб адабгъувалиин вая камк кайи силиб сагъ апIувалиин дийибгънадар. Думу циркил хайлин улихь дубшна.
Кьюд йис мидиз улихьна Фарид Шихмягьямадов Ростов-на-Дону шагьрин силбар сагъ апIру «Астродент» клиникайизди, пациентди ваъ, духтир вуди учIвнийи. Лихури бицIи вахттIан даршра, дугъан мумкинваларикан ва ляхниъ гъазанмиш дапIнайи хъуркьуваларикан варжариинди рази пациентари кIура. Гъи дугъахьна силбар сагъ апIуз гъюрайидарин аьхю нубатар а.
«Узуз стоматология, силбар сагъ апIувалси, инсандихъди сюгьбат гъабхувалра вузуз. Инсан узухьна асас вуди силиб писди иццури ва сагъ апIбахьан гучI кади илтIикIуру. Йиз метлеб дугъан гучI уьмурлугъ дубгуз ва сагъвал ихтибарлу хилариъ айивалихъ хъугъуз гъитувалиъ айиз. Сар касдинра чав саб фила-вуш силбар сагъ апIуз гъушу вахт кIваълан гъябгъюдар, иллагьки думуган иццрушин гьисс гъапIнуш. Мектебдиъ урхури имиди хайлин йиз тай баяри, духтрихьна гъягъюз гучIури, силбарин учIрушин аьгь апIури гъахьну. Гьациб гьялнаъ саб ражари узура гъахьунзу. Иццрушин аьгь апIуз даршлуган, дадайи узу духтрихьна хъади гъушнийи. Думу духтрин мани рафтар ва ляхнихьна вуйи янашмиш’вал гъира гьархрадарзуз. Гьадмуган силбар сагъ апIру духтир хьуз кьаст гъапIнийза», – кIура Фаридди ич сюгьбатнаъ.
БицIи вахтнан арайиъ пишекарвалиъ гьамци ужуб ад ва инсанарин ихтибарвал гъазанмиш апIбан сир фтиъ аш гьерхган, Фаридди узуз швнуб-саб къайда ачмиш гъапIну. Сабпиб, варитIан асасуб, дугъан чан кIваъ айи пишейи хурайи хайирнаъ ва инсанарихьна вуйи рафтариъ айи.
Фарид Шихмягьямадов 2001-пи йисан Краснодар крайин Туапсе шагьриъ бабкан гъахьну. Дугъан аьхю абйир-бабар ЗертIил гъул’ан Дагъустандин Огни шагьриз кюч гъахьидар вуйи. Аба Рамазанов Шамсудин Жамалудинович хайлин йисари Дагъустандин Огни шагьриъ математикайин дарсар кивру мялим вуди гъахьну.
Фарид мектебдиъ урхури имиди авиамоделированиейиин юкIв алир вуйи. Дугъу самолетарин конструкцйир чав тартиб ва гьязур апIури гъахьну. Балин яшар 12 йис вуйиган, думу чан радиоуправляемый ЯК 54 самолет хьади мялимдихъди Москва шагьриз Вариурусатдин урхурайидарин авиамоделированиейиан илимдинна техникайин олимпиадайиъ иштирак хьуз гъушну. Жюрийи дугъан ляхниз заан кьимат тувнийи.
Авиамоделированиейилан гъайри, Фарид бицIи вахтнахъанмина спортдиинра машгъул вуди гъахьну. Дугъу 5 йислан 13 йис хьайиз спортивный акробатикайиан аьгъювалар гъадагъури гъахьну. 2014-пи йисан Туапсе шагьрин атлетикайин командайиз Испанияйиъ гъягъюрайи варихалкьарин талитариъ иштирак хьуз теклиф дивру. Думуган Туапсейин спортсменари спортивный атлетикайиан чпин гьязур дапIнайи ужуб программа Лондондиъ, Дрездендиъ, Люксембургдиъ, Барселонайиъ, Париждиъ ва Европайин жара шагьрариъ улупну.
«Вари шагьрарикан узуз Париж кIваинди имизуз. Учухъди хъайи вари спортсменариз асас вуди думу шагьриз гъягъюз ккунди гъабхьну. Дурари Париждикан саб йишваъра адру успагьи йишвканси улхуйи. Узу думу шагьриз саб аьламатдизси ккилигури гъахьунза. Дина гъафиган мюгьтал гъахьнийзу, жара аьдати шагьрарикан думу сабдинра тафавутлу шуладайи. Мидланра гъайри, думу лап чиркин шагьур вуйи. Гьадму Эйфелин чIвурдналан гъайри, душваъ кIвак кабсруб фукIара адайи», – ктибтура Фаридди командайихъди талитариз гъушу вахтар кIваина хури.
Фаридди, Туапсе шагьриъ Роснефтдин физикайианна математикайин асас аьгъювалар тувру мектеб ккудубкIну, Ростовдин гьюкуматдин медицинайин институтдик урхуз кучIвну.
Сюгьбатнаъ узу дугъхьан, силбар фици уьрхюруш, мясляаьт тувуб ккун гъапIнийза.
«Сабпи нубатнаъди узуз ижми щеткайихьди йигьаг абхурайиганси чпин силбар марцц апIурайидарихьна илтIикIуз ккундузуз. Дициб къайдайиинди силбар марцц апIували эмаль чIилли апIуру ва сппарин нагар иццру шулу. Силбар гъюдли щеткайи ва ирригатори марцц апIинай. Газ кайи ва меъли штар, кофе цIибди ухай. Дурарик силбарин эмаль пуч апIру пигментар ка. Дурар ишлетмиш апIбан кьяляхъ силбарихъан марцци шид хъажабгъну ккунду. Гьацира наркотикар ва папрус ишлетмиш апIували силбар ухди пуч апIуру. Гьар гьацI йисак стомотологдихьна профилактикайиз гъягъювал къайдайиъ аш, харжи шулдар», – гъапнийи духтри.
Стоматологияйин кабинетдиан удучIву Фарид спортзализ гъягъюра. Гьамусяаьт думу боксдиин машгъул ву.
Сад йис улихьна Фаридди хал-хизан ккебгъну. Уьмрин юлдаш Маринайихъди Фарид чан баб Мухлисайи таниш гъапIнийи. Урусатдиъ вердиш духьнайи бализ жигьил дагълу шуран успагьивал ва намуслувал сабдупну кьабул гъабхьнийи. Дурар йисан саки кьюб ражари багъри ватандиз гъюри шулу. Багахь гележегдиъ Фаридди чан хал-хизандихъди Дагъустандин Огни шагьриз чан абйирин ругариина гьамишандиз гъюз планламиш дапIна. Хъа ужур пишекар наан ашра, пациентари агиди.
