Магьа Варихалкьарин дишагьлийирин йигъ – 8-пи март улубкьну. Гьарсар кас чан дада, баб, чи му машкврихъди тебрик апIуз чалишмиш шула. Улихьна йигъари Краснодар крайдин Армавир шагьриъ яшамиш шулайи Замира Рамазанова, чан сижар – Сефият Гьяжимирзаевайиз газатдиан тина 8-пи мартдин машквар тебрик апIбан бадали, редакцияйиз илтIикIнийи.

Замирайи туврайи мялуматариинди, Сефият Рамазанова 1947-пи йисан Хив райондин ГъуштIил гъулаъ нежбрин хизандиъ бабкан гъахьну. 7-пи класс ккудубкIбалан кьяляхъ, Сефият Фурдагъ гъулаз гизаф бицIидар айи хизандиз швуваз гъягъюру. Дугъан сижар, гъагъиди иццру духьну, хайлин йисари ахниъ ахъру. Сефиятди, хулан вари ляхнар чан кIул’ина гъадагъну, дурар лазим вуйиганси вари тамам апIури гъахьну.

Иццру кас хулаъ айивал – фукьан-вушра читин аьгьвалат ву. Амма Сефиятди, халис табасаран дишагьлийиси, вари аьхю хизандизра лигури, халачира убхури гъахьну. Думу, уьмриъ фукьан-вушра читинвалар алахьу кас вушра, чан кьисматниин гьич саб вахт-нара наразиди гъахьундар.

2012-пи йисан гъагъи уьзриан Сефият халайин уьмрин юлдаш Абукар Рамазанов рягьматдиз гъушну. Хизандин эйси имдаршра, Сефият хала, гьарганси, гьамусра хизандин веледарин арайиъ сабвал ади, албагувал уьбхюри, дурариз чахьан шлу кюмек апIури яшамиш шула. Дугъан веледари думу дадавалин чешнеси гьисаб апIура.

Гъийин йигъаз Сефият халайиз 7 байна 2 риш ва 19 худул а. Дурар Урусатдин жюрбежюр шагьрариъ яшамиш шула. Дугъан шубур байна аьхюну риш Каспийскдиъ, бицIину риш – Мягьячгъалайиъ, имбуну баяр – Хасавюрт, Вологда ва Армавир шагьрариъ, хъа сарнур дадайихъди гъулаъ яшамиш шула. Гъит, гьамцдар игит дишагьлийир ихь арайиан зат кам даришри. Хъа Сефият халайиз Аллагьу Тяаьлайи сагъу ва ярхи уьмур туври.

Аьхириъ пуз ккундузузки, Арм-вириъ яшамиш шулайи бали Аьлибегу, швушву ва худли Абукари Сефият хала вари чан баярин, шубарин, худларин, язнйирин терефнаан улубкьурайи 8-пи мартдин машкврахъди тебрик апIура.