Нариза ТIаибова
Мартдин 10-пи йигъан Дагъустандин МЧС-дин министр Нариман Къазимягьямадов Хив райондиз гъафну. Дугъахъди РД-йин главайин айтIан политикайин ва ерли гьюкмин управлениейин вакил Марат Рягьимовра хъайи.
Райондиъ дурар администрацияйин заседанйир гъахру залиъ гъуларин ерли поселенйирин главйирихъди гюрюшмиш гъахьну.
Район яшайиш жигьатнаан артмиш апIбан месэлйирикан улхури, сюгьбатнаъ Нариман Къазимягьямадовди уч духьнайидарин асас фикир гъи гьам йишвариина, гьамсана уьлкейин хатIасузвал уьбхбан важиблувалиина жалб гъапIну.
– Гъи уьлкейин хатIасузвал ухькан гьарсарикан асиллу вуйивал гьисабназ гъадабгъну, йишвариин главйири жямяаьтлугъдихъди гъаврикк ккаъбан ляхин гъабхбаъ аьхю мяна а. Урусатдин Яракьлу Кьувватариз жигьилар гъуллугъназ жалб апIбан месэлйир гьар йигъандин гюзчиваликк гъитну ккунду. Райондин гьюкмин кIулиъ айидарина дявдин комиссариатдин ва йишвариин гьюкум тешкил апIурайи вакилари сигъ аьлакьайиъди ляхин гъабхували чан натижйир тувди. Текрар апIураза, мушваъ сикин дарди жигьиларихъди гъаврикк ккаъбан ляхин гъабхуб лазим ву, – гъапну министри.
РД-йин главайин айтIан месэлйириз лигру ва ерли гьюкмин управлениейин вакил Марат Рягьимовди чан улхбаъ яракьлу кьувватариз гъуллугъназ гъягъюз ккуни ватандашариз гъи гьюкуматдин терефнаан туврайи кюмекнакан яркьуди гъапну.
– Аьхиримжи юкьуд йисан ихь варидарин метлеб уьлкейин хатIасузвалин месэла къайдайиккна хуб вуйихь. Му жигьатнаан Урусатдин Президентдин гюзчиваликкди гъизгъин ляхин гъабхура. Ватанперверарин маракьар уьрхювали, дурарин хизанарин яшайиш за апIбан месэлйири ихь гьарсарин ляхниъ асас йишв дибисну ккунду. Йишвариин гъабхурайи гъаврикк ккаъбан ляхин зяиф дапIну ккундар, – аьлава гъапIну дугъу.
Улхбарин натижайиъ серенжемдин иштиракчйири йишвариин му жигьатнаан гъузрайи камиваларикан, чпиз алахьурайи читинваларикан, улупнайи месэлйир гьял апIбан рякъярикан яркьуди гъулхну.
Мидин кьяляхъ Нариман Къазимягяьмадовди ва Хив райондин глава Ярмет Ярметовди саб жерге яшайишдин месэлйирин гьякьнаан агьалйирра кьабул гъапIну. Мушваъ асас вуди улхуб райондин саб бязи гъулариъ учIруди гъубзрайи акварин месэлайикан гъубшну.
