Йиз фикриан (газат урхрудар узухъди рази шул кIури, хиял вуйиз), аьхю тухум хьувал – хизандин бахт ву. Фицики, ихь абйирин тахаллусариъ дупнайиганси, бина ккебгъну, саб ляхин-кар апIруган, гъирагъдилан гъабхьи жакьвлин кюмекра аьхю кюмек ву.

 

 

 

Гьаци хьузра ву. Хал-йишв, сумчир-салам, багъ-бахча ккебгъруган, лазим вуйи диллигра гъадабгъну, думу ишлетмиш апIруган, жара касдиз флану кьадар кепек-шигьира тувну, думу масу дисуз варидариан удукьури шулдар. Хъа дицибдиз жвуванур (жвувандар) айиган, жвувхьан шлу гьякь-гьюрмат апIури, изан му кIулизра тму кIулизра, вуйиб гьисабназ гъадабгъури, гаф-чIал дапIну, ляхин худнаъ ипру.

Ав, мициб хазнавалин, аьд-аьдалатнан лишан ва рякъ ихь абйирилан тина ухьуз гъубзнайиб ву. Ухьу, му хазна тарабгъуз гъидритди, насларихьан насларихьна рубкьуз ва дурарихьди уьбхюз гъитуз буржлу вухьа.

Гьаму йигъари Хив гъулаъ Везироварин (хъа му фамилия ихь халкьдиз таниш ву: мурарин аьхю аба Асланбег Везиров аьгъдру ва дугъкан деребхьу кас ихь райондиъ тек-бирра адаршул) хизандиъ эвленмиш духьнайи аьхюну бализ хулар ккергъуз бисми дапIну, шибритIар адатIну. Зиихъ узу улупнайи аьдат мурарин аьхю тухмиъ ами. ШибритIариина, янаки милаз, 24 жилижви гъафнийи. Лисуз, хуш зарафатра ади, шибритIарра адатIну, дурар ацIузра хъуркьну. Мурариз лисуз табасаран халкьдин халис хурагар гьязур апIуз тухмин аьхю кIуларин хизанар дуфнайи. Дурари хачун, кьялан штун, йиккун цIикбар, таза ччилан хинкIар ва рижвар-маар гьязур дапIнайи. Лисуз ушв гьибтуз хътакдариз иштагьнан ва халис табасаран халкьдин хурагар али ярхи суфра гъябкъиган, эрг’вал кайи жанар, гъваълан хъибтрайи таза йифун шидси, хъитуз хъюгънийи.

Хуларин эйси Закир Везировди шибритIарин зиъхъан мурччваъ аьбаси, дюгю, дяхнин удрар, хю, чIихир айи бицIи чукка (кала) ивнийи. Мура ихь халкьдин аьдат ву.

Гъит, дугъу гъапиганси, дерккрайи таза хулариан ризкь, иман, шадвал ва акувал кам дарибшри! Диврайи таза хулар чпиъ яшамиш хьуз сагъ`вал хъайидар ишри! Ишру сесер ва гъягъру нивгъар анжагъ бицIидариндар ишри!