Дагъустан Республикайин гьюликкан балугъар ккадагъру карханайи гъябгъюрайи йисандин 4 вазлин арайиъ 5 агъзурна 376 тонна балугъар ккадагъну кIури, Росрыболовствойин Кафари Кавказдин аьтрафариин али Управлениейин пресс-гъуллугъну хабар тувра. Пресс-гъуллугънаан вуйи мялуматариинди, му кьадар сачдин тялукь вахтнатIан 5 ражари артухъди ву. Янаки 2019-пи йисан эвелиан апрелин аьхириз карханайи ккадагъу балугъарин кьадар 983 тонна вуйи.

 

 

 

Думу мялуматнаъ къайд дапIнайиганси, ккадагъурайи балугъарин кьадар артухъ хьувал асас вуди артмиш шулайи килькайин циркли гъабхурайи ляхникан асиллу ву. Ццийин эвелиан мина гьюликкан 4 агъзурна 500 тонна килька ккадабгъна. Му кьадар сачдин тялукь вахтнахъди тевиш, сач апрелин аьхириз ккадабгънайи килькайин кьадар 237 тонна вуйи.

 

Мидланра гъайри, балугъар дисуз 193 ихтиярнан кагъзар тувна ва тяйин кьадартIан дисуз ихтияр адру жюрейин балугъар ккадагъузра 978 йикьрар йитIна.