Зубайдат Шябанова
Гьаму йигъари Москва шагьриъ илимдин цирклиъ аьгъювалар гъадагъурайи жигьиларин Вариурусатдин «Гележегдиз гам» форум кIули гъубшну. Душваъ уьлкейин 53 региондиан 987 кас гьаму деврин илимдинна технологйирин цирклариан чпин проектар хьади иштирак гъахьну.
Форумдиъ Дагъустандиан 26 бай-риш иштирак гъахьнийи. Дурарин арайиъ Табасаран райондин гимназияйин 10-пи классдиъ урхурайи Асадуллагь Шихмягьямадовра айи.
Асадуллагьди «Юриспруденция» секцияйиъ сабпи йишв лайикьлуди гъазанмиш гъапIну. Дугъан проект «Яшарикк ккуркьну адру бицIидар цифровой тахсиркарваларихьна жалб апIуб: ихтиярарин анализ ва профилактика» темайиз бахш дапIнайиб вуйи. Жюрийи му проектдиз варитIан заан кьимат дивну ва Асадуллагь илимдин медалиинди лишанлу гъапIну.
Рази апIурайиб гьадму вуки, му Вариурусатдин машгьур форумдиъ Табасаран райондин гимназияйиъ урхурайидар иштирак ва гъалиб хьувал ужуб аьдатнаъ абхъра. Райондин образование заан дережайиъ айиб тасдикь апIури, му гимназияйин магьа кьюдпи йис ву. Гъубшу йисан думу форумдиъ гъалибвал гимназияйин 11-пи классдиъ урхурайи Алина Къарахановайи гъадабгънийи.
«Ихь бицIидари уьлкейин варитIан аьхю форумариъ гъалибвалар гъадагъурайивали ухьу дюзи рякъюъ айиваликан кIура. Ихь ученикариз учIру месэлйир гъитIиркIуз гучI кадрувал лапра важиблу ву. Гъубшу йисан думу форумдиз Алинайи хизандин аьрваларикан ва дишагьлийирин ихтиярарикан проект гьязур гъапIнийи. Гьамус Асадуллагьдира гъагъи месэла гъитIибкIна. Дугъан ахтармиш’валари деврин баяр-шубарин учIру месэлйир гьял апIбаъ чпин маракьлувал айиб улупура», – гъапнийи Табасаран райондин глава Мягьямед Къурбановди, гъалибчи ва дугъан илимдин насигьятчи тебрик апIури.
Асадуллагьдин илимдин проектдин руководитель гимназияйин директор Элина Шихмягьямадова ву. Форумдин кьяляхъ узу Элина Шихмягьямадовайихьна Аса-дуллагьдикан ва федеральный дережайиъ заан натижа улупу проектдикан суалар хьади илтIикIнийза.
«Думу проект гьязур апIури хайлин вахт гъабхьнийич, фицики му темайи бинайиан аналитикайин кьатI’и ляхин ва гьякьикьи далилар ккун апIурайи. Асадуллагьдихъди сатIиди учу теория ахтармиш дапIну, райондиъ ва республикайиъ шулайи дугъри дюшюшарин анализ гъубхунча. Асас фикир, юридический месэлйиризси, бицIидар психологияйин гьяракатариинди цифровой тахсиркарваларихьна жалб апIурайивализ туври гъахьунча.
Москвайиъ конкурсдиъ гъалиб хьпан кьяляхъ ихь делегацияйиз Урусатдин Президентдин багахь хьайи Дагъустан Республикайин вакиларин идарайизра теклиф дивнийи. Душваъра Асадуллагьди чан проектдихъди вари таниш гъапIну.
ИкибаштIан, проект гьязур апIурайи вахтна читинваларра гъахьунчуз. Сабпиб, гьаму тема учв гизаф гъагъиб вуйи. Юридический кьатI’и далилар, тажрубайин мялуматар ва статистика проектдин чIалназ адабгъну ккундийи. Асадулла конкурсдихьна гьязур гъахьну. Дугъан метлеб, чан проект улупубси, гьаму жямяаьтлугъдин учIру месэла варидари гьисс апIуз гъитубра вуйи. Конкурсариъ Асадулла гъалиб шули сабпи раж дар. Думу «Урусатдин прокуратура: партияйихъан вуйи лигуб», «Миллетдин дамагъ» ва республикайин хайлин жара конкурсарин гъалибчи ва призер гъахьну.
Гимназияйин директор ва илимдин руководитель вуди, узуз ихь уьмриъ алахьурайи дюшюшар ич проектдин ляхниъ гьял дапIну ккуни месэлйирси гъитIирккувал гизаф важиблу вузуз. Цифровой мядан гъи бицIидарин уьмрин аьхюну пай дубхьна. Гьаддиз мектебдин вазифа, аьгъювалар тувбахъди сабси, бицIидариз хатIалуваларикан вахтниинди мялуматар тувубра ву», – ктибтнийи Элина Шихмягьямадовайи.
