Магьа хьадукарра ихь уьмриъ убчIвну. Адаршвурайи кюкйири, дишагьлийирин машквар вуйи 8-пи Мартдин Йигъу му фасил юкIв ачухъди къаршуламиш апIуз гъитру. Мани шавгьри ихь улдарик кучра ва табиаьт чру рангнахьди рибхьуз хъюбгъра. Дишагьлийирин машкврbн улихь узуз, кIваантIан марцци зегьмет зигури, жвуван вазифйир тамам апIбан бадали, чпиз айи аьгъювалар ишлетмиш апIурайи, гьар вахтна кIвантIарикк инчI ккади шлу дишагьлийирикан пуз ккунди азуз.
Узу Зияфет Гьаруновайихъди таниш гъахьиган, ТIюрягъ гъулаъ яшамиш шулайи касди апIру гафаригъ урус чIал гьапIуз гъипруш, гьерхнийза.
«Узу Астрахань шагьриъ бабкан гъахьунза. Йиз адаш Абзудин Аьшурялиевди думу шагьрин медицинайин институтдиъ урхурайи. Дугъан урхуб ккудубкIбалан кьяляхъ, ич хизан Псков шагьриз кючмиш гъабхьну, ва ккергъбан классарин мектеб узу гьаду-шваъ ккудубкIунза», – ктибтура гьар вахтна инчI ккади гафар апIру йиз сюгьбатчийи.
1994-пи йисан Гьаруно-варин хизан Дагъустандиз хъадабкну гъафну ва Зияфетди Дербент шагьрин 15-пи нумрайин мектебдин 5-пи классдиъ урхуз хъюгъру.
2001-пи йисан ужудар аьгъювалариинди 11-пи класс ккудубкIу Зияфетди Дербент шагьрин медицинайин колледждиъ урхуб давам апIуру.
«Студент вахтари узу медицинайин аьгъювалар колледж-диътIан хулаъ артухъди гъадагъури шуйза. Дербент шагьриъ участокдин терапевтди лихурайи йиз адашди, азад вахт ккабхъубси, узуз тувнайи тема фунуб вуш аьгъю дапIну, суалар туври, узухъди гьар вахтна сюгьбатар гъахури, узуз аьгъдруб улупури шуйи. Колледждиъ мялимари тувру аьгъюваларихьна хулаъра аьгъювалар гъадагъруган, узуз урхувал рягьятди алабхъунзуз», – давам гъапIнийи Зияфет Абзудиновнайи.
Гьаммишан шагьрариъ яшамиш шули гъахьи жигьил риш, урхуб ккудубкIбан кьяляхъ, чан адашдин багъри ТIюрягъ ва ТинитI гъулариъ лихуру ва цIиб вахтналан гъул`ан вуйи жигьил Вадимдихъди хизанра ккебгъру. Гьамусяаьт му жигьил хизанди 2 байра тербияламиш апIура. Жвуван пишейиин юкIв али З.А.Гьаруновайи чан гъарашугъарихъди, 220 хал айи гъулан агьалйирин сагъламвал уьбхюри, участокдин медсестрайин вазифйир намуслувалиинди кIули гъахура.
Йигъ-йишв дарпиди, дих гъапIиган ктIерццу инсандихьна, хъуркьрайи Зияфетди чан ляхниъ алахьру читинваларикан гьамци гъапну: «Иццрурихьна дих гъапIиган, йишвнура гъягъюри шулза. Ликри гизаф лицруган, калушар ухди чIяргъюри шулиз. 2011-пи йисазкьан ич ФАП-диъ участокдин духтир айи. Гьамусяаьт айидар 4 кас вуча: медсестра, 2 акушерар ва стоматолог. Учхьан шлу кюмек дапIну, лазим гъабхьиган, аьзарлу кас райондиъ айи ич участокдин духтрихьна гьаърача».
Гьар 5 йисандин арайиъ кIули гъягъру курсариъси, ЦРБ-йира вазлиъ сабан тешкил апIру аьгъюваларин дережа мюгькам апIбан серенжемариъра иштирак шули, Зияфет Абзудиновнайи «Медицина Дагестана» газат ва 20 йисан терапевтди гъилиху чан адашди уч гъапIу медицинайин библиотекайиан вуйи китабарра чан ляхниъ ишлетмиш апIура. Аьхиримжи йисари Интернетдиъра лазим вуйи мялуматар агури, чан пишекарвалин дережа гьаммишан за апIура.
