Зубайдат Шябанова
Гьаму йигъари Табасаран райондин глава Мягьямед Къурбановдин регьберваликкди райондин администрацияйиъ ЕГЭ-йин гьязурлугвалариз бахш дапIнайи совещание кIули гъубшну.
Совещаниейиъ имтигьнар гъахру пунктарин кIулиъ айидар ва ЕГЭ-йиъ иштирак шлу технический цирклихъан жавабдар пишекрар иштирак гъахьну.
КIваин апIуз ккундучуз, 2026-пи йисан Табасаран райондин мектебариъ 11-пи классдин 369 выпускникди ЕГЭ ва 9-пи класс ккудубкIурайи 908 ученикди ОГЭ тувру.
Райондиъ имтигьнар тувру 3 пункт арццна. Дурар Хючна гъулан 1-пи нумрайин лицейин, Хянягъ ва ТIаттил гъуларин мектебарин бинайиин ачмиш дапIна. Имтигьнар гъахру пунктариъ гъийин йигъаз региональный вари апробацйир духна. Апрелин 20-пи йигъан вари пунктариъ 9-пи классариз математикайиан апробация гъубхну.
Думу пунктар лазим вуйи вари техникайин алатарихъди тямин дапIна. Имтигьнар гъахру пунктарин руководителарин тIалабниинди принтерар, аккумуляторар, ноутбукар, жара оргтехника ва бикIру алатар аьлава вуди гъадагъиди. Мидланра гъайри, видеойин гюзчивал гъабхру гъурулушарра зяифди вуйи йишвариъ къайдайиз хиди.
Главайи гьюкуматдин сабвуйи имтигьнарин тешкиллувал мюгькам гюзчиваликк ккайиваликан ва ЕГЭ-йин серенжемариъ иштирак шулайи гьарсар касди чан ляхин баркаллуди ва жавабдарвалиинди дубхну ккуниваликан гъапну.
Табасаран райондиъ ЕГЭ-йин серенжемарихъан ва дидин тешкиллувалихъан жавабдар гъуллугъчи, райондин образованиейин управлениейин начальникдин заместитель Багъиш Аьгьмадов ву. Совещаниейин кьяляхъ узу дугъахъди сюгьбат гъубхнийза.
«Табасаран райондиъ ЕГЭ саб ва ОГЭ шубуб пунктариъ тувру. Гъийин йигъаз, канцелярияйин шей’ар ктарди, имтигьнариъ лазим вуйиб вари масу гъадабгънача. Аьхиримжи вахтари ихь республикайиъ шулайи тябиаьтдин завалар варидариз рякъюрахьуз. Эгер имтигьян тувру йигъан аквар кутIушвбан вая интернет хъадабхъбан дюшюшар гъахьиш, учу аьлава генераторар, аьлакьа къайдайиз хру резервдин каналар гьяракатнаъ ирчуз гьязурвалар духнача.
БицIидар имтигьнар тувру пунктариз мектебарин автобусариъди хиди. Дурарихъди, мялимарилан гъайри, бицIидарихъан жавабдарвал гъабхурайи касарра шулу. Гъи райондиъ 48 мектебдиз автобусар а. Хъа адру йишварианра бицIидар хуз транспорт тешкил апIурча.
Райондиъ телефонар имтигьнариъ ишлетмиш апIбан дюшюшар хьидар. Учу му къайда чIур дарапIуз имтигьнин тешкилатчйирихъди, гюзчивал гъабхурайидарихъди тялукь сюгьбатар гъахури шулча.
Цци ЕГЭ 369 выпускникди ва ОГЭ 908 урхурайири тувди. ЕГЭ-йин натижйирикан улихь ккамиди пуз ккундарзуз, хъа, вушра, гъубшу йисан ихь бицIидари 99 процент ЕГЭ ва 80-тIан артухъ процент ОГЭ тувнийи. Цци ЕГЭ 100 процент тувди ва ОГЭ-йианра имтигьян тувуз дархьиди гъуздар хьидар кIури, миж кивуз ккундучуз», – гъапну Багъиш Аьгьмадовди.
