Гюльнара Мягьямедова

Дагъустандиз Урусатдин ФСБ-йин сяргьятарин гъуллугънан гьяракатнан ляхнарин месэлйириз лигру идарайин кIулиъ айирин заместитель Олег Гайденко гъафну. Думу гъюбан метлеб региондин глава Сергей Меликов РФ-дин ФСБ-йин Дагъустандиъ айи сяргьятарин идарайин цIийи начальник Сергей Поповдихъди таниш апIуб вуйи.

 

Кьюбиб терефари гьюкуматдин саламатвал, къанундин къайда ва яшайишдинна экономикайин артмиш’вал асиллу вуйи важиблу регион вуйи Дагъустандиъ сяргьятар уьрхбан гъуллугъ артмиш ва мюгькам апIбан месэлйир гьял гъапIнийи. Сяргьятчйирин гъуллугъналан деврин хатIалуваларихъди женг гъабхбан ляхнин натижйир асиллу шула.

Сергей Меликовди гьюкмин органари ва сяргьятчивалин гъуллугъари чиб-чпихъди аьлакьйир уьрхбан важиблуваликан, цIийиди дерккнайи Сергей Поповдиз кюмек тувуз гьязур вуйиваликан гъапнийи ва дугъаз чан жавабдар гъуллугънаъ хъуркьувалар ккун гъапIнийи. Дугъан гафариинди, сатIиди гъабхру ляхни хатIасузвал мюгькам апIуз ва регион артмиш апIуз кюмек тувди.

Сергей Поповди, чаин хъугъ’вал апIбаз чухсагъул дупну, гьюкуматдин сяргьятар уьрхбан ляхниъ шлубкьан гизаф зегьмет зигуз гаф тувнийи.
Къайд апIурача, Сергей Поповдиз Урусатдин ФСБ-йин сяргьятчивалин гъуллугънан ляхнарин аьхю тажруба а. Думу гизаф йисари Дальний Востокдиъ, Таджикистан Республикайиъ ва Кафари Кавказдиъ эскервалин гъуллугъариъ гъилихур ву.

2017-пи йисан Урусатдин ФСБ-йин Саратовдин ва Самарайин областарин сяргьятарин управлениейиан Сергей Попов Карелия Республикайиз гьаънийи. Душваъ думу сифте Урусатдин ФСБ-йин Карелияйин сяргьятарин управлениейин начальникдин заместителди, хъасин идарайин начальникди гъилихнийи.

Гъуллугънаъ ужудар хъуркьувалар гъазанмиш апIбаз дилигну, Сергей Попов гьюкуматдин ва чпин идарайин наградйириинди лишанлу дапIна.