Гьарсар бажаранлу касдин уьмриъ дугъан хъуркьуваларик аьхю пай кивру инсан ади шулу. Хъа думу кас бабкан гъахьихъан мина дугъу алдабгъурайи гьарсаб гам улариккди, фикриъди уьбхюрайи, чан веледдиз хъайи-хъайиси тербия туврайи, хизандин гъайгъушнариз лигурайи, гьюкуматдин ляхниъ зегьмет зигурайи дадайикан цIибдитIан кIваин апIури шулдар.
«Табасарандин нурар» газатдин 8-пи мартдин машкврин йигъан чапдиан удубчIвру нумра гьязур апIайиз цIиб вахт ккимиди, узуз багъри Дагъустандихьан ярхла Украинайин Одесса шагьриъ яшамиш шулайи Жвулли гъулан вакил Райгьанат кIваин гъахьунзуз. Фицики думу вари дюн’яйиз машгьур вуйи музыкант Тимур Гьясратовдин дада ву. Тимурин гъардаш Русланра гьадму рякъюъди гъягъюра.
Чан баярин музыкайихьна вуйи ккунивал фици ачмиш гъапIнуш, дурар гьадму рякъюъди гьамцдар хъуркьуваларихьна фици гъафнуш аьгъю апIбан бадали, узу Райгьанат Гьясратовайихьна суалар хьади илтIикIнийза.
«Узу гъулаъ мектеб ккудубкIнийза. Музыкайиин гьарган юкIв алир вуйза. Хъа думу вахтари абйир-бабари шубариз мяълийир апIуз ихтияр туври шулдайи. Йиз адашдира узу урхуз гьаундайи, мяълийирра халачи убхругантIан апIуз шулдайи. Гьаци вушра, кIваъ дерин хиял ади гъабхьнийиз, эгер узу эвленмиш духьну, узуз веледар гъахьиш, дурар музыкантар хьуз гъитувал»,
– къайд гъапIнийи Райгьанатди.
– Тимур лап бицIиди имиди, узу йиз кIваъ айи хиялиин ляхин апIуз хъюгънийза – бицIи балихъди музыкайиин машгъул духьнайча. Гьамци йисар гъягъюрайи. Узуз му рякъюъ рягьятди алабхъну гъапиш, хъугъуз даршул. Му аьхю зегьмет ву, хъа хъуркьувалихьна вуйи рякъ гъагъиб ва ярхиб вуйи. Тимур – дамариъ дагъус-танлуйин гъизгъин ифи айи дирбаш бай вуйи, чаз туврайи тербияра дугъу гьарган гъадабгъудайи. Амма узуз, йиз кIваъ айи метлеб кIулиз адабгъуз кьадарсуз ккунивали, кьувват туврайзуз, ва узу гележегдиъ бали хъуркьувалар гъадагъруваликан саб ражарира умуд ктабтIундайза.
Консерваторияйин сабпи курснаъ концерт тувбан кьяляхъ, Тимур учв дюз рякъюъ айивалиин умудлу гъахьнийи. Дидхъан тина йиз юкIвра сикин гъабхьнийи. КIваъ айиб кIулиз удубчIвурайивал гъябкъюнзуз. Консерватория хъуркьувалиинди ккудубкIу Тимур Германияйиъ Фрайбургдин заан мектебдик урхуз кучIвнийи ва вари Европайиъ кIули гъягъру конкурсариъ иштирак хьуз хъюгънийи. Хайлин конкурсариъ думу гъалибра шуйи, 8 ражари сабпи йишвар гъадагънийи. Гьамус Тимури гизаф йишвариъ концертар тувра, дугъан концертар тешкил апIру идара гьаммишан гьадму ляхнихъ хъа.
Саб ражари Тимурин концерт Зарифа Аьбдуллаевайи регьбервал туврайи оркестрихъди Мягьячгъалайиъра кIули гъубшнийи. Гьелбетда, думу йигъ йиз ужуди кIваин илмийиз. Баярин хъуркьувалари бабарик хлинццар кивру. Узу гизаф шад вуза, – давам гъапIнийи дугъу.
– Тимури Фрайбург ва Штутгарт шагьрариъ университетдиъ дарсар кивра. Дугъаз гизаф ученикар а, дурарикан 100-тIан артухъ касар музыка-йиин машгъул ву.
Баяри классикарин мукьмар йивруган, хъпехъуз гизаф ккундузуз. Узуз ккуни музыкайикан улхуруш, Прокофьевдин «Наваждение», Бетховендин «Аппассионата», Чай-ковскийдин «Щелкунчик», Листдин «Кампанелла», Равелдин «Ночной гаспар» эсерарихъ ва гизаф жарадарихъ аьхю аьшкьниинди хъпехъури шулза.
Узуз айи кьюбби баярра пианис-тар гъахьну. Русландира, музыкайин Академия ккудубкIну, пианино-йихъ мукьмар йивбан чан устадвал Германияйиъ давам гъапIну. Кми-кмиди Европайиз концертар тувуз тIирхури шулу. Йиз баяри сатIиди концерт гьязур апIур ва Европайин агьалйири дурарин устадвализ ужуб кьимат тувур кIури, умуд кивраза.
Гьамусдин деврин жигьил дадйириз, кIваъ айи хиял тамам апIбан бадали, зегьмет дизигну ккуниваликан пуз ккундузуз. Эгер кIваантIан хъюгъну зегьмет гъизигиш, инсандихьан вари читин месэлйир гьял апIуз удукьуру. Хъа мюгькам зегьмет зигузра аьгъяди ккунду, хасиятнак думу ктарш, метлебнахъ хъуркьузра хьидар, – аьлава гъапIнийи Райгьанат Гьясратовайи.
Райгьанат Аьлимягьямедовна, уву Варихалкьарин дишагьлийирин йигъахъди – 8-пи мартдихъди тебрик апIураза! Уву яв бицIидар ккунивалиинди ва назукди аьхю гъапIунва, хизандин саламатвал гъюбхюнва, веледариз хъуркьувалар гъадагъуз кьувват тувунва. Гъит, яв уьмриъ хъана артухъ шаду йигъар, шаду гьядисйир ишри.
