Эгер, коронавирусдихъди аьлакьалу вуди, учвуз ичв пишекарвалиан ляхин бихъурадарш ва учву жара цирклиан саб жюрейинра тажруба адарди ляхин абгуз мажбур духьнаш, компьютериан манзилнан къайдайиинди ляхин абгру тялукь сервисариз илтIикIай. Дурари учву йикьрарин къайдайиинди кьабул апIуру.
Гъи компьютерихъан манзилнаъди лихру ляхнарикан варитIан игьтияж айи 12 пише гьамрар ву: Инстаграмдин директдин менеджер, муштарйириз кюмек тувру менеджер, интернет-тукандин менеджер, финансарин консультант, страхование апIрур, идарйириз лихру касар кьабул апIру менеджер, таргетолог (рекламайин игьтияж айи муштарйирихьна думу социалин сетарин кюмекниинди рубкьуз гъитру пишекар), SММ-сяняаьткар, копирайтер (интернетдиъ чап апIбан бадали, заказниинди макьалйир дикIру кас), сайтар яратмиш апIру вакилар, видеомонтажер (гьадму гьисабнаан инстаграмдинра), хал-мулк арендайиз тувру агент ву.
Онлайн къайдайиинди ляхин фици дабгну ккундуш ва гьаддихъди сабси «ляхин тувру» лути касарин мюргъяриъ фици адрахъди гъузруш, узу интернетдиъ ляхниз инсанар кьабул апIру пишекрарин теклифарихъ хъпехънийза.
Дурарин гафариинди, ичв пишейиан тяди ляхин дабгну ккундуш, учву учвкан ляхниз кьабул апIуз кюмек тувру жикъи мялумат гьязур апIинай. Интернетдиъ ичвубсиб пишейин сагьибарин гьациб мялуматдихъди таниш йихьай, гьадушваъ атIагнайи ужударсдар терефариз фикир тувай. Учву лихуз кьаст дапIнайи йишван кIулиъ айирин ерина учву айивал фикриз гъадабгъай: учвуз фицдар гъуллугъчйир багахь хьади ккундийчвуз? Ляхниз гъушиган, сюгьбатнаъ гъи учву дизайнер вая балач, ясана журналист вуйиваликан, хъа гьацI йислан жара ляхниз гъягъюз планламиш дапIнайиваликан кIуруб дар. Аьдат вуйиганси, фунуб ляхнин кIулиъ айирира лихуз кьабул апIурайи гъуллугъчи хайлин йисариз лихуз кьаст ади гъадагъуру.
Лихру йишвар а. Асасуб лути касарин сайтариъ адра-хъувал ву. Вари сайтариъ тестарин табшуругъ тамам апIувал ккун апIура. Эгер тестарин табшуругъар ярхидар ва пулихъди вуйидар вуш, гьадушваъ лутивал хьуб мумкин ву. Ляхин туврайи касдин гьякьнаан мяна ачухъ апIурайи къайд урхуз тIагъру мапIанай. Хъа эгер учвуз кучIал гъапIнуш, дидкан интернетдиъ хабар тувай – диди, белки, жара инсанар угърийирихьан уьрхюз кюмек тувур.
