Улихь ккимиди гъадабгъу тестди улупганси, 28-пи апрелиз Табасаран райондиъ коронавирусдиан сар кас аьзарлу духьна. Му мялумат учуз Табасаран райондин ЦРБ-йин кIулин духтир Абсередин Мирзабеговди (шиклиъ) тувну. Якьинди уьзур каш аьгъю апIбан бадали, шакнакк ккайи аьзарлуйин тест Москвайин лабораторияйиз хъадапIна.
«Гьамусяаьт райондиъ коронавирусдихъди аьлакьалу вуди читин аьгьвалат айи регионариан дуфнайи 230 кас духтрарин гюзчиваликк кка. Райондиъ Covid-19 инфекция каш ахтармиш апIбан бадали, 300-тIан артухъ проб апIбар уч дапIну, Мягьячгъалайиз хъадаънача. Гьаму уьзур республикайиъ тарабгъуз хъюгъю садпи йигъарилан мина температура за дубхьнайи гьарсар кас больницайиз гъахури, ккаъри, гюзчиваликк гъитри, учу хайлин ляхин гъубхунча. Магьа санра (28-апрели – Г.М.) больницайиз температура ади, грипп кайи 5-6 кас гъахну. Дурар, гизафси Мягьячгъалайин, Дербентдин больницйириъ чпин жюрбежюр уьзрар сагъ дапIну, хъадакну дуфнайидар ву.
Мумкин вуйи читин аьгьвалатнахьна вахт ккимиди гьязур хьпан бадали, райондин поликлиникайин 2-пи мертеба коронавирусдин инфекция кайидариз койкйир дивбан бадали азад апIурача – му жюрейин вакьиъйирихьна вахтниинди гьязур хьувалтIан ужуб фукIара адар. Республикайин имбу райбольницйирихьди тевиш, ихь ЦРБ-йиъ бакарназ лазим вуйи дармнарин саб вазлиз вуйи запас айич. Райондин аптекайин гъуллугъчйирира кюмек тувра, чухсагъул чпиз. ФАП-ариз 10 йигъаз запас ади дезинфекция апIру шей’ар тувназа – идарйириъ йигъан саб ражарикьан дезинфекция гъабхбан бадали. Гьаму жюрейиинди ляхин гъабхували учуз уьзрихьна имбу районариътIан ужуди гьязур хьуз мумкинвал тувну. Гъи, ул дарибшри, Табасаран райондиъ, чав гизаф агьал-йир айиб вушра, коронавирусдихъди вуйи аьгьвалат ужуб ву.
Гьамусяаьт РД-йин Минздравдин терефнаан гьаму месэлйир гьял апIуз дакьатар гъурукьунчухьна. Дурар лазим вуйи дармнар артухъдиси масу гъадагъуз харж апIидича. Саб йишвлан тмуну йишв’ина гъабхру рентген-аппарат, гьацира каталкйир, бактерйир ва вирусар йихру кварцдин лампйир заказ апIуз ният айиз. Учу больницайиъ варитIан читин аьгьвалатнахьна гьязур шулача.
Газатдин машариан тина райондин агьалйирихьна илтIикIуз ккундузуз: чарасуз герек’вал адарди райондиан мина-тина гъягъювал дебккай. Республикайиъ гьаму уьзрихъди аьлакьалу аьгьвалат лап читинуб дубхьна, гьаддиз, жвув, жвуван хизанарин сагъ’вал бадали, хулариъ гъузай. Температура за гъабхьибси, духтрариз хабар дебккай»,
– гъапнийи А. Мирзабеговди.
29-пи апрелиз вуйи улупбариинди, республикайиъ коронавирусдиан 1231 кас аьзарлу духьна, 12 кас кечмиш гъахьну, 88 кас – сагъ. Гьадму гьисабнаан Дербентдиъ – 19 кас, Дагъ.Огнийиъ – 2 кас, Дербент райондиъ – 1 кас аьзарлу духьна.
