Гюльнара Мягьямедова
20-пи майди Урусатдин Федерацияйин Президентдин Дагъустан Республикайиъ айи ватандашар кьабул апIру йишваъ республикайин кIулиъ айи Федор Щукинди сабпи ражари агьалйир кьабул гъапIну. Думу муниципалитетариъ инфраструктура артмиш апIбахъди аьлакьалу дагъустанлуйирин месэлйирихъ хъпехъну.
Федор Щукинди чахьна илтIикIу Гюльпери Рашидова яшамиш шулайи хулариз газ зигбан месэла ухди гьял апIуб табшурмиш гъапIну. Хусуси метлеб айи дявдин операцияйин иштиракчийин хпир, гизаф бицIидар хъайи Гюльпери Рашидова региондин кIулиъ айирихьна Дагъустандин Огни шагьриъ Мягьячгъалайин кючейиъ айи чан хулариз газ зигуб ккун апIури илтIикIнийи. Газ адрувализ дилигну, хизандихьан чпин хулариъ яшамиш хьуз шуладар. Дурар кьаби дада ва инвалид бицIир хъади, яшайишдин ужудар шартIар адру йишваъ яшамиш шула.
РД-йин энергетикайин ва тарифарин(кьиматарин) министрин вазифйир тамам апIурайи Марат Шихялиевди гъапиганси, аьрза апIури дуфнайи дишагьлийин месэла идарайин гюзчиваликк кка. Сетевой компанияйихъди йитIнайи йикьрариз асас вуди, хулариз газ зигуб гьаму йисан сентябриз планламиш дапIну айи. Гюльпери Рашидовайи аьрзайиз дилигну, Федор Щукинди дугъан хуларихъна газ зигувалин вари ляхнар июлин аьхириз ккудукIуб табшурмиш гъапIну. Мидланра савайи, аьрза апIури дуфнайириз рубкьурайи пулин кюмек – газдин оборудование гъадабгъуз лазим вуйи 100 агъзур манатра тувди.
Вахтназ вуди республикайин кIулиъ айир Дербентдин агьали Санжа Агъабеговайин аьрзайихъра хъпехънийи. Умурдиновдин ччвурнахъ хъайи кючейин 28-пи нумрайин хулариъ айи дугъан квартирайиз гъваълан шид гъюри, цалариз мершв йивура. Хъа капитальный расвалин ляхнар 2039-пи йисазтIан планламиш дапIнадар.
Министрарин вазифйир тамам апIурайидарин жавабарихъ хъебехъну, Федор Щукинди вари ляхнарик гьяракат кипуб ккун гъапIнийи: «Фукьан ухди рас гъапIиш, гьадмукьан ужуди ву. Хъа гьялакди дапIну, хъана шид гъюруси дарибшри. Тикилишчивалин ляхнар вари мюгькамди дапIну ккунду». Республикайин кIулиъ айири месэла 1-пи ноябрь улубкьайиз гьял апIуб табшурмиш гъапIнийи.
Федор Щукиндихьна Избербашдин агьали, гъагъи зийнин кьяляхъ хусуси метлеб айи дявдин операцияйиан кьяляхъ дуфнайи Муслим Сулейманов учв яшамиш шулайи кюче рас апIуб ккун апIури илтIикIнийи. Гьацира расвалин ляхнар гъахуб ккун апIури, Къарабудагъкент райондиан муниципалитетдин депутат Мягьямадгьянапи Абакаровра илтIикIнийи. Улихьнаси гъургъу аьхю мархьарин натижайиъ советарин вахтари тикмиш дапIнайи гъяд абхъну. Гьар йигъан думу гъядлан 1000 машин гъягъюрайи. Гъядун гъирагъдиан гъябгъюрайи рякъюъди мектебдиз, ляхниз гъягърударин гизаф вахт харж шула. Мягьямадгьянапи Абакаровди гъяд рас апIбан ляхник гьяракат кипуб ккун гъапIнийи.
Республикайин кIулиъ айири гъяд рас апIбан ляхин чан гюзчиваликкна гъадабгъурайиваликан гъапнийи. Чахьна илтIикIу ватандашарин месэлйирин гьякьнаан Федор Щукинди жавабдар идарйириз табшуругъар тувнийи.
