Наргиз Гюлечова
Ккудубшу йисан августдин вазли образованиейин цирклиан «Йиз бизнес» центри тешкил дапIнайи «Дилаварчи дада» кIуру грантдин конкурсдиъ ихь ватанагьли Зарият Гьяжиибрагьимовайин «Дадайин ирс» ччвур тувнайи проект гъалиб гъабхьну.
Думу проектдин асас метлеб Мягьячгъалайиъ яшамиш шулайи шубариз халачи убхуз улупуб вуйи. Проектарин конкурсдиъ гъалиб гъахьи Зариятдиз 150 агъзур манатдин грант тувнийи.
Гьаддмихъанмина дугъу, Мягьячгъалала шагьриъ учв ляхин апIурайи «Чегери» кIуру устаханайиъ, проектдиъ улупнайи серенжемар гъахури, халачачивалин дарсар кивуз хъюгъну. Меркездин мектебариъ урхурайи 15 бицIи шубариз 6 вазлин арайиъ ихь устадри халачачивалин кесп улупну.
23-пи майди республикайин Этноцентриъ проектдин натижйир йивбан серенжем кIули гъубшну. Серенжем гъабхуз гьязур дапIнайи йишв табасаран халачйирихъди ккабалгнайивалин саягъ гъябкъиган, гьяйран шуйи.
Мяракайин проектдиъ иштирак гъахьи шубар, чпин дадйирра хъади, таб йивури чпи гъурху бицIи халачйирра хьади гъафнийи.
Мина гьацира хайлин гьюрматлу хяларра уч духьнайи. Гьадрарин арайиъ Урусат Федерацияйин халкьдин устад, Дагъустандин медениятдин лайикьлу гъуллугъчи, «Гьяйтагъар» этноцентрин директор Зубайдат Гьясанова, Хив райондин Мажвгул гъулан советдин глава Мейлан Нежефов, Мажвгларин халачйирин фабрикайин директор Расул Гьяжиибрагьимов, табасаран халкьдин сяняаьткарвалин ирс уьбхбан рякъюъ аьхю зегьмет зигурайи ихь вататанагьли Мурадяли Къараханов ва хъанара жара касар айи.
Серенжемдиз дуфнайи хялариз, халачи убхувал фтилан ккебгърайиб вуш, фици мурслар гьязур апIураш, фици рангар рихьураш – вари хъайи-хъайиси улупнайи сягьнара гьязур дапIнайи.
Мярака проектдиъ иштирак гъахьи шубари чпи гъурху бицIи халачйирра хьади «халачачийин ялхъвнилан» ккебгънийи. Ялхъвнин кьяляхъ, шубари дуркьаригъ ккудубкIнайи халачи гъядабтIбан ва, халачи гъядабтIган, меълишнар пай апIбан сягьнара улупнийи.
«Мягьячгъалайин 1-пи нумрайин гимназияйианна 14-пи нумрайин мектебдиан дуфнайи шубари чпиз халачи убхуз дубгъуз ккунивал улупнийи. ИкибаштIан, халачийикан саб хабарра адру шубариз думу фу вуш улупуб лап читин ляхин вуйи. Эвелиан дурарихъди ляхин апIуз хъюгъруган, гвачIтIан хябяхъдизкьан гьаруриз жа-жаради фикир туври шуйза. Хъа яваш-явашди вердиш хьуз хъюгънийи.
Узу дурариз чпин гьарурин хатIасузвал уьбхбан бадали, таб йивури халачи убхуз улупунза. Гьарсар шураз чан сабпи халачи убхуз кIури, дуркьарра гьязур дапIнайча. Дурар гьязур гъапIур ихь Мурадяли Къараханов ву. Чухсагъул чаз», – гъапну Зарият Гьяжиибрагьимовайи.
Халкьарин аьдати палтар али шубари, дурари чпин хилариинди гъурху уччвудар рангарин халачйири, му маракьлу мяракайиинна мешреб гъабхьнийи. Проектдин натижйир йивуз гьязур дапIнайи серенжем «Дадайин ирс» проектдиъ иштирак гъахьи шубариз сарун халачачивал аьгъюб тасдикь апIурайи сертификатариинди ва пешкешар тувбиинди аьхирихъна гъафнийи.
