Наргиз Гюлечова
Гьаму йисан 27-пи июнди Урусатдиъ Жигьиларин йигъ къайд апIиди. Му машквар гьар йисан кIули гъябгъюрайиб ву. Цци думу саб вуйи «Мурад-метлеб. Дамагъ. Сабвал» концепцияйиинди гъабхуз планариъ а.
Дагъустандин жигьиларин ляхнариз лигру министр Камил Сяидовди журналистарихъди гюрюшмиш духьну, Жигьиларин йигъахъди аьлакьалу вуди планламиш дапIнайи серенжемарикан ктибтну. Министри къайд гъапIганси, ихь республика гизаф жигьилар айи регионарикан саб ву. Гьаддиз му йигъан жигьилариз бахш дапIнайи жюрбежюр серенжемар Мягьячгълайин СтIал Сулеймандин ччвурнахъ хъайи паркдиъси, республикайин вари муниципалитетариъра кIули гъягъиди.
«Гьамусяаьт Жигьиларин йигъ къайд апIбахъди аьлакьалу гьязурлугваларин ляхнар планламиш апIура. Пландиъ концертарин программйир, спортдин талитар, образованиейин цирклиан серенжемар, жюрбежюр мастер-классар, жигьиларин проектарин ярмаркйир ва хъанара жара мяракйир улупна.
Мисал вуди гъадабгъиш, ккудубшу йисан республикайиъ Жигьиларин йигъ къайд апIбан серенжемариъ 100 агъзуртIан артухъ инсанар иштирак гъахьну. Гьадму йигъан Урусатдин Президент Владимир Путинра видео аьлакьайиинди иштирак духьну, Табасаран райондиъ гизаф ляхнар кIулиз адагъру Жигьиларин центра ачмиш гъапIнийи. Думу центр «Жигьилариз вуйи регион» Урусатдин жигьиларин федеральный программайиинди арайиз гъабхиб ву», – гъапну министри.
Камил Сяидовди туву мялуматариинди, цци Урусатдиъ 28 форум планламиш дапIна. Гьадрарикан 20 –вариусатдин, хъа 8 форум округарин мяна айидар ву.
«Гьар йисан вари дережайин форумариъ Дагъустандиан 1300-тIан артухъ жигьилар иштирак шула. Думу форумарин дахилнаъди иштиракчйирин жягьтлувалариз кюмек вуди, жигьиларин ляхнариз лигру Федеральный агентствойин грантарин конкурсарра гъахура ва гъалибчйириз чпин проектар уьмриз кечирмиш апIуз пулин дакьатарра тувра. Ккудубшу йисан республикайин жигьиларин проектар уьмриз кечирмиш апIуз 70 миллион манатдин грантар тувну. Гъийин жигьилар проектарин конкурсарихьна жалб апIуз му ужуб гьевес капIрайи ляхин ву», – гъапнийи министри.
Камил Сяидовди 5-пи сентябриан 10-пи сентябризкьан республикайиъ кIули гъябгъру «Каспий» форумдин гьякьнаанра мялуматар тувнийи. Дугъан гафариинди, цци форум сабпи ражари вуди Дербент шагьриъ кIули гъябгъиди. Форумдиъ улупнайи 500 йишв’ина гъийин йигъаз шубуб агъзуртIан артухъ жигьиларихьан аьрзйир дуфна.
«Форум округдинуб вушра, иштирак хьуз Урусатдин 50 региондиан жигьилар гъюз кка. Цци форумдин варитIан асас тема ватанпервервалинуб, ву, хъа программайиъ волонтервалин, тарих уьбхбан темйирра атIагна. Му мяналу серенжемдиъ иштирак шлудариз, чпин аьгъювалар артухъ апIузси, грантарин конкурсариъ проектарра уьрхюз мумкинвал шула. Мина гизаф касар кьабул апIуз шуладаршра, иштирак гъахьидар артухъ аьгъювалар, цIийи таниш’валар, хъа саспидар кIуруш, грантариз туву дакьатар хьади форумдиан кьяляхъ гъягъиди», – гъапнийи республикайин жигьиларин ляхнариз лигру ведомствойин кIулиъ айири.
Гьямусяаьтна бицIи грантар гъадагъузра аьрзйир кьабул апIура кIури, – аьлава гъапIнийи Камил Сяидовди. Дугъан гафариинди, 14 йислан 35 йис’ина яшар духьнайи жигьиларихьан проектар гьязур дапIну, грантарин конкурсариз аьрза тувуз шулу. Аьрзйир 16-пи июндизкьан кьабул апIура. БицIи грантариз туврайи дакьатар 5 агъзур манатдилан 300 агъзур манатдиина ву. Сабпи ражари проект гьязур дапIну, иштирак хьуз ккуни касариз му варитIан ужуб мумкинвал ву.
