Наргиз Гюлечова
Цци хьадукран вазари региондиъ гъургъу мархьар-селлери, гъулар-хуларизси, гъулан мяшатдизра гизаф зарар тувну. Хайлин хутIлар, йимишарин багълар ккадахьну. Табиаьтдин завалин натижйир арайиан адагъбан бадали, репсубликайин гъулан мяишатдин пишекрари аьхю зегьмет зигура.
РД-йин гъулан мяшатдин ва ипIру-убхъру сурсатарин министрин сарпи заместитель Шарип Шариповди тувнайи мялуматариинди, гьавйир цIиб манишнахъинди илтIикIубси, Дагъустандин 8 райондин 20 мяишатдиъ цIийи багъар итуз хъюгъну. Уьмуми гьисабариинди 544 гектариъ гъелемар кивну. Улупнайи кьадар багъларикан 239 гектариъ хифарна аьмлюхъяр, 138 гектариъ вичарна жихрар, 168 гектариъ гилар айи йимишар, гьадрарикан 140 гектар беълийирин багълариз жара гъапIну. Къайд дапIну ккундуки, аьхиримжи 7 йисандин арайиъ республикайиъ сабишв’инди мукьан кьадар беълийирин багълар итри сабпи раж ву.
Шарип Шариповди гъапиганси, гилар айи йимишар гьясил апIбаъ Дагъустан Урусатдин кIакIначи регион ву. Республикайиъ гилар айи йимишарин багъларин кьадар 10,5 агъзур гектар дубхьна.
«Циркил артмиш апIуз гьюкуматди туврайи кюмек, му ляхниин юкIв алди, жилихъ лап кIваантIан хъюгъну, зегьмет зигурайи касарихьна рубкьну ккунду. Гьаддиз, Дагъустандин муниципалитетарин администрацйирин гъулан мяишатдин управленийирин пишекрарикан, цIийи багълар киврайи мяишатариз гьюкуматдин терефнаан кюмек апIбан бадали, дурари апIурайи ляхнин мониторинг гъабхуб тIалаб дапIна», – гъапнийи Шарип Шариповди.
Министрин заместителин гафариинди, кивру гъелемар гьясил апIурайи республикайин мяишатари гъийин йигъаз 1 миллионтIан артухъ аьдад гъелемар гьязур гъапIну. Мидиз улихьна йисари, республикайиз гъелемар асас вуди жара регионариан хури, багълариъ итри гъахьну.
«Республикайиъ киврайи багъларикан варитIан аьхюнубсиб пай СтIал-Сулейман райондин мяишатариъ кивра. Хъа Дагъустандин багъманчивалин кIакIнаъ айи кархана «Полоса» ООО мяишат ву. Гъийин йигъаз вари республикайиъ итрайи йимишарин багъларикан 80% гьаму мяишатдиъ киврайидар ву. Цци душваъ 50 гектариъ жихрарин гъелемар итна. Гьаму 50 гектарра кади, вари багъдин кьадар 280 гектар дубхьна, ва думу гьамусяаьт Урусатдиъ айи жихрарин варитIан аьхю багъси гьисаб апIура. Гьаддихъди сабси «Полоса» ООО-йиъ беълийирин, аьмлюхъярин, вичарин ва бадамдин багъларра артмиш шула», – аьлава гъапIнийи Шарип Шариповди.
