Гюльнара Мягьямедова
Мектебариъ 2026-пи йисандин ЕГЭ тувну ккудубкIну, хъа чпин кьиматариин рази дарудариз саб дарснаан хъана ЕГЭ тувру йигъар улупна. Гьаму йисан чпин кьимат дигиш апIуз ккунидариз 8-9-пи июлин йигъар тяйин дапIна.
Урусатдин мярифатнан министерствойи ва Рособрнадзори уьлкейиъ кIули гъубшу ЕГЭ-йин сифте вуйи натижйир гъивну. РФ-дин мярифатнан министерствойин кIулиъ айи Сергей Кравцовди гьюкуматдин сатIи вуйи имтигьнарин натижйир йислан-йисаз ужу шулайиваликан гъапнийи.
Урусатдин мектебариъ ЕГЭ тувуз хъюгъхъанмина 25 йисандин арайиъ сабпи ражари сар шуру 500 балл гъадабгъну. Москвайин 1409-пи нумрайин мектебдиъ гъурху Екатерина Малковайи 5 имтигьян гьар са-саб 100 баллиз тувну. Дугъу урус чIалнаан, профильный математикайиан, информатикайиан, физикайиан ва химияйиан варитIан заан баллар гъадагъну.
Рособрнадзорин глава Анзор Музаевди къайд гъапI-ганси, гьаму йисан ЕГЭ-йиан 8759 касди 100 балл гъадагъну. Думу кьадарнакан 933 касди кьюб имтигьяндиан 200 балл, 76 касди шубуб имтигьяндиан 300 балл, 8 касди юкьуб имтигьяндиан 400 балл гъадагъну.
Учу, «Табасарандин нурар» газатдин редакцияйин вакилари, гьар йисан 100 балл гъадабгъу ихь баяр-шубарикан бикIури шулуча. Гьаму йисанра аьдат ккутIрадарча.
Гъяякент райондин Дружба гъулан кьялан мектебдиъ гъурху Асли Пировайи (шиклиъ) обществознаниейин ЕГЭ-йиан 100 балл гъазанмиш гъапIну. Думу гьацира гьар йисан табасаран чIалнаан гъахурайи олимпиадйириъ иштирак шули гъахьну. Гьаму йисан дугъу республикайин конкурсдиъ 1-пи йишв гъадабгъну. Узу Аслийихъди телефондиан гафар гъапIунза.
«Узу ЕГЭ-йихьна гьязур шули, гизаф зегьмет гъизигунза. Йиз хъуркьуваларик ич мялим Жанна Гьяжибеговна Агъарягьимовайин лайикьлу пай ка. Дугъу учуз ужудар аьгъювалар тувну. Гьаму урхбан йисан обществознаниейиан онлайн-мектебдиъ урхуз хъюгънийза. Думу мектебди йиз аьгъювалар мюгькам гъапIну. Гьюрматлу Жанна Гьяжибеговна, узуз гьамцдар аьгъювалар тувбаз чухсагъул, уву учуз дарсар урхузси, фикир апIуз ва мурад-метлебнахъ хъуркьуз улупунва.
Мектебдин директор Ибрагьим Гьясанович Гьясанялиевдиз, мектебдин ляхин ужуди албагбаз, кIул’инди чухсагъул кIураза, мушваъ гьарсари жвув аьхю хизандин саб пай вуйиси гьисс апIури гъахьунча. Мектебдиъ адау йисар гьаммишандиз кIваъ уьрхидича», – гъапнийи Асли Пировайи.
Гьамус мектеб ккудубкIнайи ихь баяр-шубарин улихь хъана читин месэла – вуздик урхуз кучIвуб – дийибгъна. Аслийи юридический факультет кадабгъна. Думу рякъюъ вари выпускникариз кIваъ айи хиялар кIулиз удучIвуб ккун апIурача.
