Коронавирусдин инфекцияйин тIягъвникан, 60 ва артухъ йисар духьнайи агьли касаризси, бицIир хуз гъагъдиъ айи дишагьлийиризра аьхю хатIа а. Гъи гъагъдиъ айи гизаф дишагьлийир думу уьзрихьан чпи фици уьрхюруш, эгер думу чпик кубчIвиш, велед фицир шулуш, фикрарикк кахъна.
Гьямила айи дишагьлийирихьан гьаммишан хулаъ гъузуз шулдар. Дурар кми-кмиди дишагьлийириз консультацйир тувру духтрарихьна, аптекйириз, анализар тувуз, УЗИ апIуз ва гьацира пландиинди тамам дапIну ккуни жара ляхнариз лигуз гъягъюру. Ва, ухьуз рябкъюрайиганси, чпиз ккундушра-ккундаршра дурар жара агьалйирихъди гюрюшмиш шулу. ТIягъвнин вахтна фтихьан гучI дапIну ккундуш ва жвув COVID-19 вирусдихьан фици уьрхюруш, Каспийск шагьрин ЦГБ-йин бицIидар хру хулан кIулин духтрин заместителин вазифйир тамам апIурайи, COVID-19 кади гъагъдиъ айи дишагьлийирин госпиталин начальник Ибрегьим АьбдулмутIалибовдихъди сюгьбат гъубхнийза.
«Дишагьли бицIир хьуз гъагъдиъ айи вахтна, дугъаз фунуб-вушра вирусдин инфекцияйихьан хатIа а. Гъагъдиъ гъахьи сабпи вазари жвув грипп, герпес, ОРВИ, цитомегаловирус ва жара инфекцйирихьан шлубкьан дюрхну ккунду. Учхьан гьелелиг коронавирусди веледдиз фициб тясир апIураш пуз шуладарчухьан, амма хатIа айиваликан мялум вучуз. Гъагъдиъ айи дишагьлийири чпин уьмрин рафтар дигиш апIуз чарасузвал адар, хъа гьаци вушра, гъи дурарин асас метлеб – гьямила гъахьи сабпи вазари чпи вирусдин инфекц-йирихьан уьрхювал ву»,
– къайд гъапIнийи Ибрегьим АьбдулмутIалибовди.
Духтрин гафариинди, думу 5-пи апрелихъан мина сад йигъра гъидидипди больницайиъ лихура. БицIидар хру хулаъ мюгькам шартIар яратмиш дапIна, коронавирусдихьан хатIасузвал уьбхру вари алатар гьуркIра.
«Каспийск шагьрин бицIидар хру хулан саб пай COVID-19 уьзур кади гъагъдиъ айи дишагьлийир сагъ апIру госпитализ илтIибкIну. Гъийин йигъан душваъ 19 дишагьли ва 12 бицIир а. Дурарикан 2 дишагьли ва 2 бицIир лап гъагъи гьялнаъ а. Учу госпиталиъ ккаърайи дишагьлийир вари пневмония ашкар дубхьнайидар ву. Дурар COVID-19 ахтармиш апIру анализарин жавабар гъяйиз жа-жара палатйириъ гъитрача. Коронавирус кайи дишагьлийириз бицIидар хру хал албагна ва штатдиъ вари пишекар духтрар лихура», – аьлава гъапIну Ибрегьим АьбдулмутIалибовди.
Гележегдиъ бабар хьуз гьязур шулайи дишагьлийириз духтрин асас теклифар: сабдихьанра гучI мапIанай, кIвак гъалаб кабхъуз мигъитанай, профилактикайин улупнайи вари къайдйир уьрхяй, кми-кмиди хилар жикIай ва дезинфекция апIинай, инчйир ва уьгьйир апIурайи инсанарихьан ярхлади гъузай, жямяаьтлугъ транспортдиъди мягъянай, туканарихьан ва гизаф инсанар уч шлу йишварихьан гъирагъ йивай. Эгер поликлиникайиз, аптекайиз, тукандиз гъягъбан чарасузвал аш, маска алабхьуз кIваълан магьарханай, ипIру хурагра тIяаьмлуб дубхьну ккунду. КIваъ, вари ужу шулу кIури, фикир уьбхяй.
Эгер гъагъдиъ айи дишагьлийин бедендин сагъ’вал зяиф, температура за, кьувват кам шулаш, уьгьйир хъивраш, чарасуз вуди хулаз участокдин духтриз дих дапIну ккунду ва духтрин насигьятарихъ хъебехъну ва дугъан теклифар тамам дапIну ккунду.
